समाजकंटकांचा ठाणे स्थानकात धिंगाणा,
शौचालयांची तोडफोड; प्रवाशांचे हाल
सकाळ वृत्तसेवा
मुंबई, ता. २४ : ठाणे रेल्वेस्थानकावरील सार्वजनिक शौचालयांवर समाजकंटकांनी अक्षरशः कहर केला असून, गुरुवारी (ता. २३) रात्री मोठ्या प्रमाणावर तोडफोड करण्यात आली. यामुळे प्रवाशांचे हाल झाले असून, सार्वजनिक स्वच्छता सुविधांचे तीनतेरा वाजले आहेत. रेल्वे प्रशासनाने या घटनेची गंभीर दखल घेतली असून, संबंधित समाजकंटकांचा शोध घेण्याचे काम सुरू आहे.
तोडफोडीमुळे कल्याण टोक असो किंवा प्लॅटफॉर्मचा मध्यभाग अनेक शौचालये तुटलेली, तुंबलेली आणि पूर्णपणे वापरात अयोग्य झाली आहेत. रेल्वे प्रशासन सध्या दुरुस्तीच्या कामात गुंतले असले, तरी प्रवाशांना मोठ्या अडचणींचा सामना करावा लागत आहे. ही तोडफोड केवळ सार्वजनिक सुविधांचे नुकसान नसून, हजारो प्रवाशांच्या आरोग्याशी आणि सुविधेशी थेट खेळण्याचा प्रकार आहे, असे मध्य रेल्वे प्रशासनाने म्हणत ज्यांच्याकडे या तोडफोडीमागील गुन्हेगारांची माहिती आहे, त्यांनी तातडीने ठाणे रेल्वे अधिकारी अथवा रेल्वे सुरक्षा बल (आरपीएफ) यांच्याशी संपर्क साधावा, असे आवाहनही केले आहे.