भुयारी मेट्रोचे चाक चिखलात!
तिकीट खिडकी, जिन्यासह फलाटावर राडारोडा; सेवा पूर्ववत होण्यास आठ-दहा दिवस लागणार

सकाळ वृत्तसेवा
मुंबई, ता. २७ : भुयारी मेट्रो-३चे चाक पुरते चिखलात रुतले आहे. वरळीच्या आचार्य अत्रे चौक स्थानकात सोमवारी (ता. २६) पावसामुळे शिरलेल्या पाण्यामुळे येथील तिकीट खिडकी, जिन्यासह फलटावर मोठ्या प्रमाणात राडारोडा पसरला आहे. तो काढण्याचे काम ‘एमएमआरसीएल’कडून युद्धपातळीवर सुरू असले तरी पाण्यामुळे बाधित झालेली सर्व प्रणाली पूर्णपणे कार्यरत होण्यास वेळ लागणार आहे. त्यामुळे या स्थानकातील सेवा पूर्ववत होण्यास आठ-दहा दिवस लागणार असल्याची माहिती सूत्रांनी दिली.

मुंबईत सोमवारी रात्रभर झालेल्या संततधार पावसामुळे वरळी येथील डॉ. अ‍ॅनी बेझंट रोडलगतच्या सांडपाणीनिस्सारण नाल्यातील पाण्याच्या दाबामुळे आचार्य अत्रे स्थानकाच्या प्रवेशद्वाराजवळ उभारलेली वॉटर-रिटेनिंग वॉल कोसळल्याची घटना घडली. त्यामुळे स्थानकात दुर्गंधीयुक्त पाण्यासह चिखलाचे साम्राज्य पसरले. मुंबई मेट्रो रेल कार्पोरेशने लिमिटेडने (एमएमआरसीएल) युद्धपातळीवर काम करीत हे पाणी बंद केले असले तरी फलाट, जिना आणि तिकीट खिडकी परिसरात जमा झालेला राडारोडा काढण्यास वेळ लागत आहे. तसेच स्वयंचलित प्रवेशद्वारासह इतर विजेवर चालणारी यंत्रणा सुरू करण्यास वेळ लागणार असल्याची माहिती ‘एमएमआरसीएल’च्या एका वरिष्ठ अधिकाऱ्याने दिली. दरम्यान, मेट्रो-३ मार्गावर सध्या आरे ते वरळीदरम्यान नियमित सेवा सुरू असून केवळ वरळी स्थानक ते आचार्य अत्रे चौक स्थानकादरम्यानची सेवा बंद असून ती पूर्ववत करण्याचे काम युद्धपातळीवर सुरू असल्याचे ‘एमएमआरसीएल’ने स्पष्ट केले आहे.

...
दुर्गंधीने कर्मचारी त्रस्त
आचार्य अत्रे चौक मेट्रोस्थानकात पावसाच्या पाण्याबरोबरच सांडपाणीनिस्सारण नाल्यातील पाणी शिरले आहे. त्यामुळे परिसरात दुर्गंधी पसरली आहे. त्यामुळे या दुर्गंधीने राडारोडा काढण्याचे काम करणारे कर्मचारी त्रस्त झाले आहेत. त्यामुळे साफसफाईच्या कामाला वेळ लागत आहे. त्यातच हे पाणी काढण्यासाठी आपत्ती व्यवस्थापन, अभियांत्रिकी व सुरक्षा पथक कार्यरत आहे; मात्र पाण्यामुळे वीजपुरवठा सुरू करणे शक्य नाही. परिणामी, चिखलाबरोबरच सफाईच्या कामासाठी मशीनच्या वापरावर मर्यादा येत आहेत.