सुरुवातीच्या टप्प्यातच कॅन्सरचे निदान
‘टाटा’मध्ये अत्याधुनिक प्रणाली

सकाळ वृत्तसेवा
मुंबई, ता. ८ : परळच्या टाटा मेमोरियल सेंटर आणि पॉवरग्रिड कॉर्पोरेशन ऑफ इंडिया यांच्यात नुकताच एक सामंजस्य करार करण्यात आला असून, त्याअंतर्गत पॉवरग्रिडने आपल्या कॉर्पोरेट सामाजिक जबाबदारी उपक्रमांतर्गत टाटा मेमोरियल रुग्णालयाला सुरुवातीच्या टप्प्यातच कॅन्सरचे निदान डिजिटल सब्ट्रॅक्शन अँजिओग्राफी (डीएसए) प्रणाली दान केली आहे. 
ही अत्याधुनिक डीएसए-सीटी प्रणाली रक्तवाहिन्या आणि मऊ ऊतींचे उच्च प्रतीचे थेट चित्रण करते. यामुळे कर्करोग रुग्णांचे निदान अधिक जलद आणि अचूक पद्धतीने करता येते तसेच त्यानुसार उपचार योजनेची आखणी शक्य होते. भारतात प्रति एक लाख लोकसंख्येमागे सुमारे १०० नागरिकांना कर्करोग होतो आणि २०२५पर्यंत यामध्ये १२.८ टक्क्यांनी वाढ होण्याचा अंदाज आहे. अशा पार्श्वभूमीवर टाटा रुग्णालयामध्ये ही तंत्रज्ञान प्रणाली दरवर्षी सुमारे ३,००० वैद्यकीय प्रक्रिया पार पाडण्यासाठी उपयुक्त ठरणार आहे. याचा सर्वाधिक लाभ गरजू रुग्णांना होईल.
‘सर्व रुग्णांना प्रगत वैद्यकीय तंत्रज्ञानाची समान उपलब्धता असली पाहिजे, हेच आमचे ध्येय आहे, असे पॉवरग्रिडचे महाप्रबंधक हरा प्रसाद पाल यांनी सांगितले. ‘हे सहकार्य रुग्णसेवेच्या दृष्टीने महत्त्वपूर्ण पाऊल आहे,’ असे टाटा मेमोरियल सेंटरचे संचालक डॉ. सुदीप गुप्ता म्हणाले.