हसन मुश्रीफ यांना दिलासा
मुंबई, ता. २५ : राष्ट्रवादी काँग्रेसचे नेते हसन मुश्रीफ यांच्याविरोधात फसवणुकीच्या आरोपाअंतर्गत दाखल प्रकरण बंद करण्याचा अहवाल सादर केल्याची माहिती कोल्हापूर पोलिसांनी बुधवारी उच्च न्यायालयात दिली. या पार्श्वभूमीवर न्या. अजय गडकरी आणि न्या. राजेश पाटील यांच्या खंडपीठाने मुश्रीफ यांनी केलेली याचिका निकाली काढली. याप्रकरणी न्यायालयाने मुश्रीफ यांना अटकेपासून आधीच अंतरिम दिलासा दिला होता. कोल्हापुरातील मुरगूड पोलिस ठाण्यात २३ फेब्रुवारी २०२३ रोजी मुश्रीफ यांच्याविरुद्ध विवेक कुलकर्णी यांच्या तक्रारीवरून गुन्हा दाखल करण्यात आला होता. दरम्यान, हा गुन्हा ‘राजकीय हेतूने प्रेरित षडयंत्र’ असल्याचे सांगून तो रद्द करण्यात यावा तसेच निकाल येईपर्यंत अटकेपासून संरक्षण द्यावे, अशी मागणी करणारी याचिका मुश्रीफ यांनी केली होती.