दिवसभर मुंबईत पावसाची हजेरी
मुंबई ता. २९ : मुंबईत रविवारी अनेक भागात दिवसभर पावसाने हजेरी लावली. शहर, पूर्व आणि पश्चिम उपनगरात सकाळपासूनच चांगला पाऊस झाला. कुलाबा, भायखळा, दादर, परळ, चेंबूर, बोरिवली, दहिसर, मालाड परिसरात चांगला पाऊस झाला. दिवसभर पाऊस कोसळत नसला तरी उघडझाप करत पावसाने सतत दर्शन दिले. मुंबईतील ३८ ठिकाणी आज पावसाची नोंद झाली. दक्षिण मुंबईत कुलाबा ४.५, भायखळा २.२८, दादर १२.१७, प्रभादेवी १३.९५, परळ १२.६८, माटुंगा १७.२६, मिमी पावसाची नोंद झाली. पूर्व उपनगरात चेंबूर ५.२, भांडुप ३.०४, कुर्ला ३.१७, घाटकोपर ४.०५, मुलुंड ४.०५ मिमी पाऊस झाला, तर पश्चिप नगरात वांद्रे ६.५, अंधेरी २.०३, बोरिवली ७.११, दहिसर ४.८२, दिंडोशी ६.०८, मालाड ८.३९ मिमी पाऊस झाला. हवामान केंद्राने वर्तवलेल्या अंदाजानुसार सोमवारी शहर आणि उपनगरात संध्याकाळी/रात्री मुसळधार पावसासह आकाश साधारणपणे ढगाळ राहील, तर कमाल आणि किमान तापमान अनुक्रमे ३१ अंश सेल्सिअस आणि २५ अंश सेल्सिअस राहण्याची शक्यता आहे.