मिरा-भाईंदरमध्ये कोविडमुळे एकाचा मृत्यू
मुंबई, ता. ४ : कोविड संसर्गामुळे मिरा-भाईंदरमधील ६५ वर्षीय महिलेचा शुक्रवारी (ता. ४) मृत्यू झाला. आरोग्य विभागाकडून मिळालेल्या माहितीनुसार, या वृद्ध महिलेला मधुमेह आणि उच्च रक्तदाबाचा त्रास होता. या मृत्यूमुळे यावर्षी राज्यात कोविड संसर्गाने मृत्युमुखी पडलेल्यांची संख्या ४० वर पोहोचली आहे. राज्यात शुक्रवारी १० नवीन कोविडबाधित आढळले. त्यापैकी सर्वाधिक तीन मुंबई आणि पुण्यात आढळले. यामध्ये मिरा-भाईंदरमध्ये तीन, नागपूर आणि चंद्रपूरमध्ये प्रत्येकी एक कोविड रुग्णांचा समावेश आहे. यासह यावर्षी राज्यात एकूण कोविडबाधितांची संख्या २,५५६ वर पोहोचली आहे. त्यापैकी १,००५ कोविडबाधित एकट्या मुंबईत आढळलेत, तर सक्रिय रुग्णांची संख्या ६८ वर आली आहे.