पॉलिटेक्निकच्या‍ प्रवेशाकडे कल वाढला
तात्पुरती यादी जाहीर; अंतिम गुणवत्ता यादी सोमवारी

मुंबई, ता. : तंत्रशिक्षण संचालनालयाच्या अंतर्गत येणाऱ्या राज्यातील दहावीनंतरच्या प्रथम वर्ष अभियांत्रिकीच्या (पॉलिटेक्निक) पदविका प्रवेशाची तात्पुरती गुणवत्ता यादी जाहीर झाली आहे. यात पात्र उमेदवारांची नावे माहिती संकेतस्थळावर प्रसिद्ध केलेली आहे, तर सोमवारी अंतिम गुणवत्ता यादी जाहीर होणार असल्याची माहिती तंत्रशिक्षण संचालनालयाकडून देण्यात आली.
तात्पुरत्या गुणवत्ता यादीत मागील काही वर्षांच्या तुलनेत ९६ ते ९९ टक्के आणि १०० टक्के गुण मिळवणाऱ्या विद्यार्थ्यांचा पॉलिटेक्निक प्रवेशाकडे कल वाढल्याचे दिसून आले आहे. या पहिल्या यादीत तब्बल एक लाख ४० हजारांहून अधिक विद्यार्थ्यांचा समावेश असून, मागील वर्षांच्या तुलनेत ही संख्या १० हजारांहून अधिक आहे. या यादीत प्रवेश नावे न आलेल्या विद्यार्थ्यांना हरकती नोंदविण्यासाठी मुभा देण्यात आली असून, त्यानंतर ७ जुलै रोजी अंतिम गुणवत्ता यादी जाहीर केली जाणार आहे, तर दुसरीकडे पॉलिटेक्निकच्या प्रवेशासाठी विद्यार्थ्यांनी मागणी केल्यानंतर ४ जुलैपर्यंत नावे नोंदवण्याची मुदत देण्यात आली होती, त्यांचाही समावेश या गुणवता यादीत केला जाणार आहे. दहावीचा निकाल लागल्यानंतर पॉलिटेक्निकचे प्रवेश वेळेत पूर्ण हाेन पुढील वर्गही वेळेत सुरू व्हावेत यासाठी तंत्रशिक्षण संचालनालयाने मुदतीअगोदर अर्ज आलेल्या विद्यार्थ्यांची तात्पुरती गुणवत्ता यादी जाहीर केली आहे.
--
पहिल्या फेरीचे नियोजन
अंतिम गुणवत्ता यादी ७ जुलै
आरक्षणनिहाय पहिल्या फेरीतील जागा ७ जुलै
पसंतीक्रम भरणे व निश्चित करणे : ८ ते १० जुलै
पहिली फेरी जागावाटप : १२ जुलै
शुल्क भरून प्रवेश निश्चित करणे : १३ ते १५ जुलै