ज्येष्ठांसाठी आरक्षित डबा; मध्य रेल्वेची योजना
सकाळ वृत्तसेवा
मुंबई, ता. ५ ः रेल्वेतील प्रचंड गर्दीत ज्येष्ठ नागरिकांना सुलभ आणि सुरक्षित प्रवासाची सोय व्हावी, यासाठी मध्य रेल्वेने अभिनंदनीय पाऊल उचलले आहे. माटुंगा रेल्वे वर्कशॉपच्या तंत्रज्ञांनी विशेष पुढाकार घेत एक मालडबा पूर्णतः ज्येष्ठ नागरिकांसाठी आरक्षित केला असून, त्यातून १५ प्रवाशांच्या अतिरिक्त आसन क्षमतेचा लाभ मिळणार आहे.
६५ वर्षांपेक्षा अधिक वयाच्या नागरिकांसाठी रेल्वेमध्ये स्वतंत्र डबा असावा, अशी मागणी गेल्या अनेक वर्षांपासून करण्यात येत होती. त्याची दखल घेत त्यानंतर झालेल्या सुनावणीत मुंबई उच्च न्यायालयाने ज्येष्ठ नागरिकांना स्वतंत्र आसनव्यवस्था पुरवण्याचे आदेश रेल्वे प्रशासनाला दिले होते. या निर्देशानुसार माटुंगा वर्कशॉपच्या कर्मचाऱ्यांनी लोकल ट्रेनच्या सहाव्या डब्याची पुनर्रचना करीत त्याला ज्येष्ठ नागरिकांसाठी समर्पित डब्यात रूपांतर केले आहे. यामुळे चढ-उतार करताना होणाऱ्या अडचणी कमी होणार असून, ज्येष्ठ नागरिकांना सुलभ आणि आरामदायक प्रवास शक्य होणार आहे. मध्य रेल्वेच्या या पायलट प्रोजेक्टला प्रवाशांकडून सकारात्मक प्रतिसाद मिळत असून भविष्यात अशा आणखी डब्यांची संख्या वाढवण्याचा रेल्वेचा विचार आहे.
....................
डब्याची वैशिष्ट्ये :
वाढीव आसन क्षमता : एकूण १३ वाढीव आसने
स्टेनलेस स्टील पार्टिशन्स : सुरक्षिततेच्या दृष्टीने मजबूत विभाजक
सुलभ प्रवेशासाठी विशेष पोल्स : दरवाजांजवळ नॉन-स्लिप ग्रॅब पोल्स
आपत्कालीन सुविधा : दरवाजात दोन्ही बाजूंना इमर्जन्सी शिडी
आकर्षक अंतर्गत सजावट : व्हाइनिल रॅपिंगने सजवलेले डब्याचे आतील भाग