मुख्यमंत्री फडणवीसांविरुद्ध गरळ ओकणे सुरू
राज-उद्धव मेळाव्यावर दरेकरांची टीका
मुंबई, ता. ५ : ठाकरे बंधूंनी आजच्या सभेत मुख्यमंत्री देवेंद्र फडणवीस यांच्याविरुद्ध गरळ ओकली; मात्र फळ देणाऱ्या झाडालाच लोक दगडं मारतात, असे प्रत्युत्तर भाजपचे विधान परिषद गटनेते प्रवीण दरेकर यांनी आज येथे दिले.
राज ठाकरे आणि उद्धव ठाकरे यांनी वरळी येथील मेळाव्यात फडणवीस यांच्याविरोधात वक्तव्य केले. आता आपले कसे होणार, या चिंतेतून अशी टीका होत आहे. उद्धव ठाकरेंना स्वार्थासाठी आता मराठी माणूस आठवला. त्यांना २० वर्षे राज ठाकरे यांच्याकडे बघायला वेळ नव्हता. आज त्यांना सन्माननीय राज ठाकरे बोलावे लागले. यामध्ये ठाकरेंचा सत्तेसाठी असणारा स्वार्थीपणा दिसून येत असल्याचा टोला दरेकरांनी लगावला.
सत्ता गेल्याचे वैषम्य उद्धव ठाकरेंच्या भाषणात दिसत होते. त्यांच्यात शरद पवार यांचेच तत्त्वज्ञान भिनले आहे, अशी टीकाही दरेकर यांनी या वेळी केली. ठाकरे यांनी मुंबई महापालिकेत कंत्राटदारांना मोठे केले आणि त्यातले किती मराठी होते? उद्धव ठाकरे मुख्यमंत्री असताना किती मराठी माणसाचे हित जपले? मराठी भाषा भवन तुमच्या काळात उभे राहू शकले नाही, हेदेखील सत्य असल्याचे दरेकर म्हणाले.