सकाळ वृत्तसेवा
मुंबई, ता. ६ : संत तुकाराम महाराजांच्याहस्ते मूर्तीची प्रतिष्ठापना झालेले मुंबईतील ‘प्रतिपंढरपूर’ म्हणून प्रसिद्ध असलेल्या वडाळ्यातील विठ्ठल रखुमाई मंदिर ओळखले जाते. या मंदिरात आषाढी एकादशीनिमित्त विविध धार्मिक कार्यक्रम पार पडले. या सोहळ्याला मोठ्या संख्येने भाविक उपस्थित होते.
४१० वर्षांची जुनी परंपरा असलेल्या वडाळ्यातील मंदिर भाविकांसाठीचे श्रद्धास्थान आहे. पंढरपूरला जाऊ न शकणाऱ्या भाविक शनिवारी रात्रीपासून दर्शनासाठी आले होते. गाभाऱ्यात फुलांची आरास आणि विठ्ठलाच्या सोन्याच्या दागिन्यांची झळाळीमुळे मंदिर परिसर भक्तीमय झाला होता. यावेळी बदलापूर, जोगेश्वरीसारख्या ठिकाणाहून आलेली भजनी मंडळांनी विविध अभंगांचे सादरीकरण केले. भाविकांच्या सुरक्षेसाठी अग्निशमन दलाची गाडी, पोलिस बंदोबस्त तैनात करण्यात आला होता. या सोहळ्यात भाजपचे नेते विनोद तावडे, लता शिंदे, आमदार कालिदास कोळंबकर, प्रसाद लाड, विनोद तावडे, मनीषा कायंदे, शीतल म्हात्रे, राजू वाघमारे, अमेय घोले यांच्यासह विविध राजकीय पक्षाचे प्रतिनिधी उपस्थित होते.
-----------------------------------------
शासनाकडून २५ कोटींचा निधी
वडाळा येथील प्रतिपंढरपुर मंदिरात उपमुख्यमंत्री एकनाथ शिंदे यांनी सकाळी अभिषेक करून सपत्नीक पूजा केली. बळीराजाला चांगला पाऊस मिळो, जनतेच्या जीवनात सुख-समाधान नांदो, अशी प्रार्थना त्यांनी केली. या प्राचीन मंदिराच्या जतन तसेच सुशोभीकरणासाठी शासनाच्यावतीने २५ कोटींचा निधी जाहीर केला. या निधीतून अंतर्गत विकास, भाविकांसाठी सुविधा आणि परिसराचे सुनियोजित सुशोभीकरण केले जाणार आहे. मंदिर समिती आराखडा तयार करत असून लवकरच कामांना सुरुवात होणार असल्याचे त्यांनी सांगितले.
---------------------------------------------
दर्शनासाठी ४ तास रांगेत
सुट्टीचा दिवस असल्याने भाविकांनी मोठी गर्दी केली होती. विठोबाच्या दर्शनासाठी जवळपास ४ तासांहून अधिक रांगेत उभे राहावे लागत होते. बदलापूरहून आलेल्या भाविक रोहित मांडवकर यांनी सालाबादप्रमाणे विठूच्या दर्शनाला आलो असल्याचे सांगितले. पंढरपुरला जाणे शक्य नाही होत. त्यामुळे इथे येऊन वारी आणि दिंडीच्या जयघोषात सहभागी झाल्याचा आनंद काही वेगळाच असल्याचे सांगितले.