उपनगरीय रुग्णालयांमधील १५३ बेड कंत्राटावर देणार
पालिकेची निविदा प्रक्रिया सुरू

सकाळ वृत्तसेवा
मुंबई, ता. ६ : पूर्व उपनगरांतील गोवंडी शताब्दी रुग्णालयाचे कामकाज खासगी कंपनीला देण्याच्या प्रयत्नांनंतर आता मुंबई महापालिकेने १२ उपनगरीय रुग्णालयांमधील सुमारे १५३ आयसीयू बेड कंत्राटावर (आउटसोर्सिंग) देण्याचा निर्णय घेतला आहे. संबंधित कंपनी या बेडसाठी तज्ज्ञांची नियुक्ती करेल.
शहरातील सामाजिक कार्यकर्त्यांनी पालिकेच्या या योजनेला विरोध करण्यास सुरुवात केली आहे. २०२५-२६च्या आर्थिक वर्षाच्या अर्थसंकल्पात महापालिकेने मुंबई उपनगरातील वाढती लोकसंख्या लक्षात घेता, रुग्णालयांमध्ये विशेष सेवा आणि आयसीयू बेडची उपलब्धता वाढवण्यावर भर दिला होता. याअंतर्गत १५३ आयसीयू बेडचे कामकाज कंत्राटावर देण्यात येत आहे. यासाठी महापालिका प्रशासनाने १५३ आयसीयू बेड दोन वर्षांसाठी खासगी आरोग्य कंपन्यांना देण्यासाठी निविदा प्रक्रियादेखील सुरू केली आहे. दोन वर्षांच्या करारावर महापालिका प्रशासन प्रति आयसीयू बेडसाठी दररोज ३,३६७ रुपये खर्च करेल. १२ उपनगरीय रुग्णालयांमध्ये १५३ आयसीयू बेडच्या संचालनासाठी तज्ज्ञांवर महापालिका प्रशासन ३३ कोटी पाच लाख पाच हजार दोन रुपये खर्च करेल. उपनगरच्या घाटकोपर येथील राजावाडी रुग्णालयातील ११ बेड, भामा रुग्णालयातील (कुर्ला) २० बेड, भामा रुग्णालयातील (बांद्रा) १२ बेड, कांदिवली येथील डॉ. बाबासाहेब आंबेडकर रुग्णालयातील १६ बेड, जोगेश्वरीच्या ट्रॉमा रुग्णालयातील १२ बेड आणि उपनगरातील इतर रुग्णालयांमधील काही असे एकूण १५३ बेड कंत्राटावर दिले जातील.
...
डॉक्टरांचा भार कमी होईल
एकूण १६ उपनगरीय रुग्णालये आहेत, जिथे दरवर्षी ४२ लाखांहून अधिक रुग्ण ओपीडीमध्ये उपचारासाठी येतात. या रुग्णालयांमध्ये २.५ लाखांहून अधिक रुग्ण दाखल होतात आणि दरवर्षी विविध आजारांवर ४२,००० शस्त्रक्रिया केल्या जातात. आयसीयू बेडचे आउटसोर्सिंग केल्याने विद्यमान कर्मचाऱ्यांवरील भार कमी होईल. आरोग्य विभागाच्या एका वरिष्ठ अधिकाऱ्याने सांगितले, की सध्या पालिका अतिदक्षता विभागातील तज्ज्ञांना आउटसोर्स करून सुमारे ५० आयसीयू बेड यशस्वीरीत्या चालवत आहे. ते म्हणाले की १५३ आयसीयू बेडच्या वापरासाठी भूलतज्ज्ञ, सर्जन, एमडी अशा डॉक्टरांची नियुक्तीदेखील आउटसोर्सिंगद्वारे केली जाईल.