पालघर‍ जिल्ह्यातील शाळांना सोमवारी सुट्टी

मुंबई, ठाण्यात मोहरमनिमित्त उर्दू शाळा बंद

मुंबई, ता. ६ : हवामान खात्याच्या अतिवृष्‍टीच्या इशाऱ्याच्या पार्श्वभूमीवर पालघर जिल्ह्यातील सर्व शाळांना सोमवारी (ता. ७) सुट्टी जाहीर करण्यात आली आहे. मुंबई शहर, उपनगर, ठाणे जिल्ह्यातील उर्दू शाळांना माेहरमनिमित्त परीक्षा आणि इतर कामकाज नसल्यास सुट्टी देण्यात आली आहे.
ठाणे आणि रायगड जिल्ह्यात शिक्षण विभागाने स्वतंत्र आदेश काढून केवळ उर्दू शाळांना मोहरमच्या सुट्टीची सवलत दिली आहे. पालघर वगळता मुंबईसह शिक्षण उपसंचालक कार्यालयाच्या क्षेत्रात सर्वत्र शाळा सुरळीत सुरू राहणार आहेत, अशी माहिती शिक्षण उपसंचालक राजेश कंकाळ यांनी दिली.
मुंबईतही हवामान खात्याने मुसळधार पावसाचा अंदाज वर्तविला असला तरी अद्याप शाळांना सुट्टी जाहीर करण्यात आलेली नाही. आवश्यकता भासल्यास त्या त्या परिसरातील शाळांना तशी सवलत दिली जाईल, अशी माहिती मुंबई महापालिका शिक्षणाधिकारी संदीप संगवे यांनी दिली.
दरम्यान, पालघर जिल्ह्यातील अंगणवाडी, सरकारी व खासगी प्राथमिक व माध्यमिक शाळा, जिल्हा परिषद शाळा, नगरपालिका शाळा, अनुदानित व विनाअनुदानित शाळा, सर्व आश्रमशाळा, सर्व महाविद्यालये तसेच आयुक्त व्यवसाय व प्रशिक्षक केंद्र यांच्या आस्थापनेवरील शैक्षणिक संस्था यांना साेमवारी जिल्हाधिकारी डॉ. इंदुराणी जाखड यांनी सुट्टी जाहीर केली आहे. मुख्याध्यापक, शिक्षक, कर्मचारी यांना मात्र आपत्ती व्‍यवस्थापनाचे काम करण्यास सांगितले आहे.
----
दहावीचा पेपर वेळापत्रकानुसारच!
दहावीच्या पुरवणी परीक्षेचा भूगोल विषयाचा सोमवारी हाेणारा अखेरचा पेपर पालघर तसेच इतर सर्व जिल्ह्यांतील परीक्षा केंद्रांवर वेळापत्रकानुसार हाेणार आहे, अशी माहिती मुंबई विभागीय शिक्षण मंडळाचे अध्यक्ष राजेंद्र अहिरे यांनी सांगितले.