सीए तरुणास आत्महत्येस
प्रवृत्त करणाऱ्यांवर गुन्हा
मुंबई, ता. ७ ः नामांकित खासगी कंपनीत लेखापाल म्हणून काम करणाऱ्या सीए तरुणास आत्महत्येस प्रवृत्त केल्याप्रकरणी वाकोला पोलिसांनी तरुणीसह दोघांविरोधात गुन्हा नोंदवला. समलैंगिक संबंधांचे व्हिडिओ व्हायरल करण्याची धमकी देत, या दोघांनी मृत तरुणाकडून तब्बल तीन कोटी रुपये उकळल्याची माहिती पोलिसांनी दिली.
राहुल परवानी, साबा कुरेशी अशी आरोपींची नावे आहेत. या दोघांच्या त्रासामुळे राज मोरे (वय ३२) या तरुणाने शनिवारी राहत्या घरी विषारी द्रव्य पिऊन आत्महत्या केली. पोलिसांना त्याच्या घरातून तीन चिठ्ठ्या सापडल्या. त्यात आरोपी राहुल आणि सबा यांचा उल्लेख आढळला. राजच्या आईने दिलेल्या तक्रारीनुसार, काही महिन्यांपूर्वी राज आणि राहुल यांची समाज माध्यमांवरून ओळख झाली होती. थोड्याच दिवसात दोघांमध्ये घट्ट मैत्री झाली; मात्र आत्महत्येपूर्वी आधी राहुल आणि साबा घरी येऊ लागले. राज - राहुल यांच्यात समलैंगिक संबंध आहेत, त्या क्षणांचे व्हिडिओ आमच्याकडे असून ते आम्ही पसरवून बदनामी करू, अशा धमक्या देऊ लागले. राजने गेल्या सात ते आठ महिन्यांत राहुल, सबा यांना सुमारे अडीच कोटी रुपये दिल्याचे स्पष्ट होते. या शिवाय राजची थार कारही आरोपींनी नेली होती, अशी माहिती राज याच्या आईने तक्रारीत दिल्याचे पोलिसांनी सांगितले.