गोराईतील बेकायदा
भिंतीवर कारवाईचे आदेश
सकाळ वृत्तसेवा
मुंबई, ता. ९ : गोराई गावातील सीआरझेड झोनमध्ये बेकायदा संरक्षक भिंतीचे बांधकाम केल्याच्या प्रकरणात महाराष्ट्र किनारी क्षेत्र व्यवस्थापन प्राधिकरणाने दखल घेतली आहे. या प्रकरणाची सखोल चौकशी करून तातडीने कारवाईचे आदेश देण्यात आले आहेत.

वॉचडॉग फाउंडेशनचे निकोलस अल्मेडा व गॉडफ्रे पिमेंटा व इतरांनी दिलेल्या तक्रारीनुसार, महाराष्ट्र पर्यटन विकास महामंडळाने गोराई गावातील सर्व्हे नंबर १, ५९, ८८, ८७ आणि ४९ या भूखंडांवर किनारी क्षेत्रात बेकायदा संरक्षक भिंत बांधली असल्याचे म्हटले आहे. या तक्रारीच्या अनुषंगाने महाराष्ट्र नवनिर्माण सेनेचे दिनेश साल्वी यांनीदेखील तक्रार दाखल केली होती. या तक्रारीमध्ये सीआरझेड अधिसूचना १९९१, २०११ आणि २०१९ तसेच उच्च न्यायालयाच्या आदेशांचे उल्लंघन झाल्याचा आरोप करण्यात आला आहे.

पर्यावरण व हवामान बदल विभागाचे उपसचिव विशाल मदने यांनी संबंधित अधिकाऱ्यांना आदेश दिले असून, १५ दिवसांत सत्य परिस्थिती, तपशीलवार चौकशी आणि झालेल्या कारवाईचा अहवाल सादर करण्यास सांगितले आहे. तसेच नियमांचे उल्लंघन आढळल्यास योग्य ती तातडीची कारवाई करण्याचे निर्देशही देण्यात आले आहेत.