डॉ. आंबेडकरांमुळेच
मंत्री होऊ शकलो!

उदय सामंत : दलित पँथरचा ५३वा वर्धापनदिन साजरा

सकाळ वृत्तसेवा
मुंबई, ता. १० : भारतरत्न डॉ. बाबासाहेब आंबेडकर यांनी देशाला संविधान दिले. या संविधानावरच देशाचे मार्गक्रमण सुरू आहे. त्यांच्यामुळेच मी आणि भरत गोगावले यांच्यासारखे लोक राज्याचे मंत्री होऊ शकले, असे कृतज्ञतापूर्ण उद्‌गार राज्याचे उद्योगमंत्री उदय सामंत यांनी काढले. दलित पँथरच्या आगामी जडणघडणीत आम्ही सदैव आपल्यासोबत असू, अशी ग्वाहीही त्यांनी दिली.
दलित पँथरचा ५३वा वर्धापनदिन नरिमन पॉइंट येथील यशवंतराव चव्हाण प्रतिष्ठान येथे आज गुरुवारी (ता. १०) पार पडला. त्या वेळी ते बोलत होते. दलित पँथरचे अध्यक्ष सुखदेव सोनावणे यांच्या अध्यक्षतेखाली झालेल्या या कार्यक्रमास पर्यटनमंत्री शंभूराज देसाई उद्‌घाटक म्हणून, तर उद्योगमंत्री उदय सामंत, रोजगार हमीमंत्री भरत गोगावले, आमदार प्रसाद लाड, दलित पॅंथर युवा अध्यक्ष शुभम सोनावणे, प्रकाश साळवे आदी प्रमुख पाहुणे म्हणून उपस्थित होते. या वेळी राज्यातील उद्योगपती, साहित्यिक व चळवळीत योगदान दिलेल्या व्यक्तींचा सत्कार करण्यात आला. सामंत पुढे म्हणाले, की रत्नागिरी जिल्ह्यातील मंडणगड या बाबासाहेबांच्या पदस्पर्शाने पावन झालेल्या रत्नागिरी जिल्ह्याचा पालकमंत्री असल्याचा आपल्याला अभिमान आहे. सरकारने बाबासाहेबांच्या शासकीय जयंतीला सुरुवात केली आहे. परदेशात गेलो असता बाबासाहेबांनी वास्तव्य केलेल्या लंडनमधील घर पाहून ऊर अभिमानाने भरून आला. दलित पँथरचा इतिहास आपल्याला ज्ञात आहे. ही चळवळ वाढली पाहिजे, यासाठी आम्ही सदैव पँथरच्या सोबत राहू, असेही ते म्हणाले.