डेसिबल मर्यादांमध्ये सुधारणेची गरज : सना मलिक-शेख
मुंबई, ता. ११ : पर्यावरण संरक्षण कायदा १९८६ अंतर्गत ठरवलेली ध्वनिप्रदूषण मर्यादा सध्याच्या परिस्थितीत अपुरी ठरत असून याकडे आमदार सना मलिक-शेख यांनी धार्मिक कार्यक्रमातून होणाऱ्या ध्वनिप्रदूषण विषयावर लक्षवेधीमध्ये आज सभागृहाचे लक्ष वेधले.

२००० मध्ये ध्वनिप्रदूषण कायदा बनविण्यात आला. त्यामध्ये रहिवासी भागात दिवसा ५५ आणि रात्री ४५ इतकी डेसिबल मर्यादा आहे. तर व्यावसायिक भागात दिवसा ६५ आणि रात्री ५५ डेसिबल व औद्योगिक परिसरात दिवसा ७५ आणि रात्री ७० डेसिबल मर्यादा आहे; मात्र आजच्या घडीला ही डेसिबल मर्यादा पार केली गेली आहे, त्यामुळे या मर्यादांमध्ये सुधारणा करण्याची गरज आहे. हा विषय केंद्र सरकारच्या अखत्यारीत येतो; परंतु राज्यात याबाबत सर्व्हे करून तसा प्रस्ताव केंद्र सरकारकडे एकमताने पाठवला तर आपल्याला नवीन डेसिबल मर्यादांमध्ये सुधारणा मिळू शकते, असे सांगत सना यांनी सभागृहातील डेसिबल मर्यादा ६०च्यावर आहे, हेही सभागृहाच्या निदर्शनास आणून दिले. यावर उत्तर देताना मुख्यमंत्री देवेंद्र फडणवीस यांनी हा विषय खरा आहे, असे सांगत या मुद्द्यावर सखोल विचार करून सुधारित मर्यादांसंदर्भात शिफारस केंद्र सरकारकडे पाठवण्याचे आश्वासन दिले.