आता ४० हजार परिचारिकांना सुरक्षेचे कवच
सरकारी रुग्णालयांमधील परिचारिकांना प्रत्येक पाळीमध्ये संरक्षण मिळणार
सकाळ वृत्तसेवा
मुंबई, ता. १३ : राज्याच्या सार्वजनिक आरोग्य विभागामार्फत चालवल्या जाणाऱ्या रुग्णालयांमध्ये काम करणाऱ्या परिचारिकांनाही तीन पाळ्यांमध्ये सुरक्षा पुरवली जाणार आहे. अमरावती येथे नुकत्याच झालेल्या दुर्घटनेच्या पार्श्वभूमीवर आरोग्य सेवा संचालनालयाने परिचारिकांना सुरक्षा पुरवण्याचा निर्णय घेतला आहे. त्यांच्या सुरक्षेची जबाबदारी महाराष्ट्र सुरक्षा दलाकडे सोपविण्यात येईल.
अमरावती जिल्हा रुग्णालयात रुग्णाच्या कुटुंबीयांनी एका परिचारिकेवर हल्ला केला. या हल्ल्यानंतर सरकारी रुग्णालयांमधील परिचारिकांच्या सुरक्षेचा मुद्दा तापला. सुरक्षेची मागणी करीत परिचारिका संघटनांनी मुंबईतील आरोग्य भवनात आरोग्य सेवा संचालनालयाच्या संचालकांची भेट घेतली.
या बैठकीत संस्थेच्या अधिकाऱ्यांनी परिचारिकांना सुरक्षा देण्याचा आग्रह धरला. त्यानंतर राज्यातील सर्व जिल्हा, उपजिल्हा आणि प्राथमिक आरोग्य केंद्रांमध्ये काम करणाऱ्या परिचारिकांना तीन शिफ्टमध्ये काम करायला लावण्यात आले.

प्रत्येक वॉर्डच्या बाहेर सुरक्षारक्षक
महाराष्ट्र राज्य परिचारिका संघटनेचे महासचिव सुमित्रा तोटे म्हणाल्या, की वैद्यकीय महाविद्यालयांमध्ये काम करणाऱ्या परिचारिकांना आधीपासून सुरक्षा दिली जाते. परंतु सार्वजनिक आरोग्य विभागामार्फत चालवल्या जाणाऱ्या रुग्णालयांमध्ये काम करणाऱ्या ४० हजार परिचारिकांच्या सुरक्षेचा प्रश्न प्रलंबित होता. अमरावतीमध्ये परिचारिकेवर झालेल्या हल्ल्यानंतर संघटनांनी परिचारिकांच्या सुरक्षेबाबत आक्रमक भूमिका स्वीकारली होती. अखेर प्रशासनाने ते गांभीर्याने घेतले.

सीसीटीव्ही वाढवणार
रुग्णालयांमधील प्रत्येक वॉर्डच्या बाहेर महाराष्ट्र सुरक्षा दलाचे जवान तैनात केले जातील. याशिवाय रुग्णालयांमध्ये सीसीटीव्ही कॅमेऱ्यांची संख्याही वाढवली जाईल. सर्व जिल्ह्यांच्या सिव्हिल सर्जन आणि रुग्णालयांच्या अधीक्षकांना सुरक्षा रक्षक पुरवण्याच्या सूचना देण्यात आल्या आहेत.