आधारिका फाउंडेशनकडून शालेय साहित्य वाटप
मुंबई, ता. १३ : मुंबईतील आधारिका फाउंडेशन या सामाजिक संस्थेकडून शहापूर तालुक्यातील आसनगाव येथील जिल्हा परिषद शाळेतील विद्यार्थ्यांना शालेय साहित्याचे मोफत वाटप करण्यात आले. या शाळेतील बहुतांश विद्यार्थी आर्थिकदृष्ट्या मागासवर्गीय कुटुंबातील असून, शाळेची स्थितीही हलाखीची असल्यामुळे विद्यार्थ्यांना शिक्षणासाठी आवश्यक साधनांची कमतरता भासत होती.
विद्यार्थ्यांना वह्या, पेन, पेन्सिल, दप्तर आदी साहित्य वाटप करण्यात आले. या उपक्रमामुळे विद्यार्थ्यांमध्ये शिक्षणाबद्दल नवी उमेद निर्माण झाली असून शाळेचे मुख्याध्यापक व पालकांनी आधारिका फाउंडेशनच्या या उपक्रमाचे कौतुक केले. संस्थेने भविष्यातही असे उपक्रम राबवण्याचा निर्धार व्यक्त केला आहे. या उपक्रमात फाउंडेशनचे संस्थापक व संचालक विनायक मोरे, संचालक संतोष मेळेकर, लेखाप्रमुख प्रसाद मोरे आणि आयटीप्रमुख प्रदीप पांचाळ यांनी सहभाग घेतला. स्थानिक पातळीवर शहापूर तालुक्यातील सामाजिक कार्यकर्त्या कल्पना तारमाळे व केतन वेखंडे यांनीही मोलाची मदत केली.