रुग्णाला मिळाली नवजीवनाची आशा
जे.जे. रुग्णालयात हृदयावर यशस्वी शस्त्रक्रिया
सकाळ वृत्तसेवा
मुंबई, ता. १३ : कांदिवलीच्या एका ५६ वर्षीय पुरुषावर जे.जे. रुग्णालयात यशस्वीपणे एक अत्यंत गुंतागुंतीची उच्च धोका असलेली ओपन-हार्ट शस्त्रक्रिया करण्यात आली. यापूर्वी या पुरुषाला रुग्णालयांनी हृदयाच्या काही अडचणींमुळे उपचार नाकारले होते. या रुग्णाला बायकस्पिड एओर्टिक स्टेनोसिस असल्याने त्याचे इजेक्शन फ्रॅक्शन (ईएफ) केवळ १०% इतकेच होते. ही एक अत्यंत गंभीर आणि जवळपास अशक्य मानल्या जाणाऱ्या या अवस्थेत रुग्णाने तब्बल एक वर्ष उपचारांसाठी धावपळ केली, अशा परिस्थितीत त्याला अनेक सरकारी व खासगी रुग्णालयांकडून उपचारास नकार देण्यात आला; मात्र जे.जे. रुग्णालय येथे कार्डिओ थोरासिक अँड व्हॅस्क्युलर शस्त्रक्रिया (सीव्हीटीएस) विभागाच्या डॉ. आशीष भिवापूरकर यांच्या नेतृत्वाखाली इतर कोणीही न घेतलेली जबाबदारी त्यांनी स्वीकारली. रुग्णावर महात्मा जोतिबा फुले जनआरोग्य योजनेंतर्गत मोफत एओर्टिक व्हॉल्व रिप्लेसमेंट पार पडली. या शस्त्रकियेत सहभागी तज्ज्ञ डॉक्टरांमध्ये डॉ. सूरज नागरे, डॉ. अमरीन शेख, डॉ. श्रुती दुबे, डॉ. झरीन रांगवाला, डॉ. अक्षयकुमार वर्मा, डॉ. रूता सुखारामवाला, डॉ. तन्मय पांडे, तसेच ऑपरेशन थिएटर वैशाली देवगावकर व पूजा मोरे यांचा समावेश होता.