विमानतळावर मोठा अपघात टळला
मालवाहू ट्रकची विमानाच्या पंख्याला धडक
सकाळ वृत्तसेवा
मुंबई, ता. १४ : छत्रपती शिवाजी महाराज आंतरराष्ट्रीय विमानतळावर सोमवारी (ता. १४) पहाटे मोठा अपघात टळला. दिल्लीला जाण्यासाठी सज्ज असलेल्या अकासा एअरच्या विमानाच्या पंख्याला एका मालवाहू ट्रकने जोरदार धडक दिली. या घटनेमुळे काही काळ विमानतळावर गोंधळाचे वातावरण निर्माण झाले होते.
मिळालेल्या माहितीनुसार, अकासा एअरचे क्यूपी-१४१० हे विमान दिल्लीला जाण्यासाठी विमानतळावर सज्ज होते. पहाटे ४.५४ वाजण्याच्या सुमारास बंगळूरहून मुंबईला आलेल्या या विमानातील साहित्य उतरवले जात असताना, बर्ड वर्ल्डवाइड फ्लाइट सर्व्हिसेस कंपनीच्या मालवाहू ट्रकने विमानाच्या उजव्या पंख्याला धडक दिली. या अपघातात विमानाचे आणि ट्रकचे नुकसान झाले. तत्काळ तांत्रिक तपासणी केल्यानंतर हे विमान उड्डाणासाठी अयोग्य असल्याचे जाहीर केले. त्यामुळे प्रवाशांना दुसऱ्या विमानाने दिल्लीला पाठवण्याची व्यवस्था अकासा एअरकडून करण्यात आली. दरम्यान, या घटनेची संबंधित यंत्रणांकडून तपास केला जात असल्याची माहिती अकासा एअरच्या प्रवक्त्यांनी दिली.