साहित्य संघ पुरस्कारासाठी आवाहन
मुंबई : मराठी साहित्य संघातर्फे दिल्या जाणाऱ्या नीलिमा भावे पुरस्कृत ‘रा. भि. जोशी’ वैचारिक साहित्य पुरस्कार, कथाकार शांताराम पुरस्कार (कथाकाराच्या पहिल्या कथासंग्रहास), चंद्रगिरी पुरस्कार (आत्मकथनपर लेखन) आणि मिलिंद गाडगीळ स्मृतिप्रीत्यर्थ ‘बालसाहित्य पुरस्कार’ या चार पुरस्कार देण्यात येतात. या पुरस्कारांसाठी १ जानेवारी २०२४ ते ३१ डिसेंबर २०२४ या कालावधीत प्रकाशित झालेली पुस्तके (दोन प्रती) ३१ ऑगस्ट २०२५ पर्यंत लेखक वा प्रकाशकांनी कार्यवाह-साहित्य शाखा, मुंबई मराठी साहित्य संघ, चौथा मजला, डॉ. भालेराव मार्ग, गिरगाव, मुंबई ४००००४ या पत्त्यावर पाठवावीत, असे आवाहन करण्यात आले आहे.
------------------------------------
लोकअदालतीचे आयोजन
मुंबई : भूमिअभिलेख विभाग, मुंबई कार्यालयाच्या वतीने अपिल प्रकरणांच्या निपटाऱ्यासाठी लोकअदालतीचे आयोजन करण्यात आले आहे. लोकअदालत सोमवारी (ता. २१) सकाळी अकरा वाजता, डी. डी. बिल्डिंग, पहिला मजला, जुने जकात घर, शहीद भगतसिंग मार्ग, फोर्ट येथे होणार आहे. या लोकअदालतीमध्ये कोकण विभागातील प्रलंबित अपिल प्रकरणांवर सुसंवादाच्या माध्यमातून न्याय व जलद निर्णय घेण्यावर भर दिला जाणार आहे. संबंधित नागरिकांनी किंवा अपीलकर्त्यांनी आपली सर्व आवश्यक कागदपत्रे व पुरावे सोबत घेऊन उपस्थित राहावे, जेणेकरून प्रकरणाचा अंतिम निपटारा करता येईल, असे आवाहन करण्यात आले आहे. अधिक माहितीसाठी व्हॉट्सॲप क्रमांक ७७१०९६१८३८ वर संपर्क साधावा.