सावत्र पित्याकडून चिमुरडीची हत्या?
ससून डॉकजवळील समुद्रात आढळला मृतदेह
मुंबई, ता. १५ : अँटॉप हिल परिसरातून सोमवारी (ता. १४) रात्री बेपत्ता झालेल्या एका बालिकेचा मृतदेह मंगळवारी सकाळी ससून डॉक येथील समुद्रात आढळून आला. सावत्र पित्याने या चार वर्षांच्या मुलीची हत्या केल्याचा संशय पोलिसांना आहे.
मिळालेल्या माहितीनुसार ही बालिका बेपत्ता झाल्याच्या तक्रारीवर अँटॉप हिल पोलिसांनी अपहरणाचा गुन्हा नोंदवला, तर समुद्रात तिचा मृतदेह आढळल्यानंतर कुलाबा पोलिसांनी अपघाती मृत्यूची नोंद घेत तिचा मृतदेह चिकित्सेसाठी जे. जे. रुग्णालयात पाठवला. अमीरा असे या बालिकेचे नाव असून, ती आणि तिची आई अँटॉप हिलच्या राजीव गांधी नगरातील बंगालीपुरा येथे वास्तव्यास होती. दोनवेळेस लग्न मोडल्यानंतर नाझियाने अलीकडेच इम्रान उर्फ इम्मू नावाच्या तरुणाशी विवाह केला होता. दरम्यान, अमीराचा मृतदेह मंगळवारी सकाळी साडेआठच्या सुमारास ससून डॉकजवळील समुद्रात मासेमारी करणाऱ्या गोपी धनू नावाच्या मच्छीमारास आढळून आला. त्याने तो समुद्राबाहेर काढून ससून डॉकच्या जेट्टीवर आणला आणि कुलाबा पोलिसांना घटनेची माहिती दिली. कुलाबा पोलिसांनी ओळख पटविण्यासाठी या बालिकेच्या मृतदेहाची छायाचित्रे लगोलग मुंबई महानगर प्रदेशातील पोलिस ठाण्यांना पाठवली. प्राथमिक चौकशीत मंगळवारी रात्री अमीराला अखेरचे सावत्र पिता इम्रान सोबत परिसरात पाहिले गेले होते. तक्रार दिल्यानंतर त्याचा फोन बंद होता आणि तोही बेपत्ता होता. त्यामुळे त्याच्यावर संशय बळावला, असे पोलिस ठाण्यातून सांगण्यात आले.