शिवडी टीबी रुग्णालयातील शस्त्रक्रियागृह धोकादायक
पालिकेच्या यांत्रिकी व विद्युत विभागानेच व्यक्त केली भीती

सकाळ वृत्तसेवा
मुंबई, ता. १६ : मुंबई महापालिकेच्या शिवडी टीबी रुग्णालयाच्या शस्त्रक्रिया विभागातील काही विद्युत उपकरणे थेट रुग्णांच्या संपर्कात येतात. उपकरणामध्ये काही बिघाड झाल्यास त्याचा परिणाम रुग्णांवर होऊ शकतो. त्यामुळे टीबी रुग्णालयाचे शस्त्रक्रियागृह जीवघेणे ठरू शकते, अशी भीती थेट पालिकेच्या यांत्रिकी व विद्युत विभागाने व्यक्त केली आहे. या भीतीपोटी येत्या काळात रिमोट अलार्म पॅनल उभारण्याचा निर्णय घेण्यात आला आहे.
खास क्षयरोगावरील उपचारांसाठी असलेल्या शिवडीच्या क्षयरोग रुग्णालयात विविध शस्त्रक्रिया केल्या जातात. शस्त्रक्रिया विभागात वापरण्यात येणाऱ्या उपकरणांमध्ये काही बिघाड झाल्यास लिकेज विद्युत प्रवाह तयार होतो. अशी उपकरणे थेट रुग्णाच्या संपर्कात आल्यास त्यांच्या जीवाला धोका निर्माण होऊ शकतो, अशी भीती व्यक्त केली आहे.

रिमोट अलार्म पॅनल उभारणार
शस्त्रक्रियागृहातील रुग्णांच्या जीवाला असलेला धोका लक्षात घेऊन रिमोट अलार्म इंडिकेशनसह मेडिकल आयसोलेशन पॅनल उभारण्याचा निर्णय घेण्यात आल्याचे पालिकेच्या यांत्रिकी व विद्युत विभागाने म्हटले आहे. पॅनलच्या उभारणीसह तीन वर्षांपर्यंतच्या देखभालीचे कंत्राट दिले जाणार असून, त्यासाठी १.८ कोटींचा खर्च केला जाणार आहे.
....
चौकशीची मागणी
शस्त्रक्रियागृहामध्ये गेल्या कित्येक वर्षांपासून रुग्णांचा जीव धोक्यात असताना दुर्लक्ष का करण्यात येत आहे? यापूर्वीच ही रिमोट अलार्म पॅनल यंत्रणा का उभारण्यात आली नाही, याबाबत चौकशी करण्याची मागणी रुग्णांच्या नातेवाइकांनी केली आहे.