सेस इमारतीतील रहिवाशांचे सर्वेक्षण
पुनर्विकासासाठी म्हाडा तयार करणार कुंडली
सकाळ वृत्तसेवा
मुंबई, ता. १६ : आठ-दहा दशकांहून अधिक जुन्या असलेल्या मुंबई शहरातील उपकरप्राप्त (सेस) इमारतीमध्ये वास्तव्यास असलेल्या रहिवाशांची आता कुंडली तयार होणार आहे. मुंबईत जवळपास १३ हजार सेस इमारती असून त्याचा टप्प्याटप्प्याने पुनर्विकास केला जाणार आहे. कोणत्या इमारतीत कोण भाडेकरू आहेत, याबाबत खातरजमा करण्यासह त्याची म्हाडाकडे नोंद राहावी, यासाठी म्हाडाच्या मुंबई इमारत दुरुस्ती व पुनर्रचना मंडळाकडून या इमारतीतील रहिवाशांचे बायोमेट्रिक सर्वेक्षण केले जाणार आहे.
मुंबई शहरातील जुन्या मोडकळीस आलेल्या सेस इमारतीची दुरुस्ती करणे, पुनर्विकास मार्गी लावण्याची जबाबदारी राज्य सरकारने म्हाडावर टाकली आहे. त्यानुसार वर्षानुवर्षे म्हाडाकडून या इमारतींची दुरुस्ती केली जात आहे; मात्र त्यापैकी अनेक इमारती दुरुस्तीच्या पलीकडे गेल्याने त्या रिकाम्या करून तेथील रहिवाशांची संक्रमण शिबिरात व्यवस्था केली जाते. या इमारतींचा पुनर्विकास व्हावा म्हणून म्हाडा प्रयत्नशील आहे. त्यामुळे संक्रमण शिबिराप्रमाणेच उपकरप्राप्त इमारतीमधील भाडेकरू रहिवाशांचे बायोमेट्रिक सर्वेक्षण केले जाणार असल्याची माहिती म्हाडाच्या एका वरिष्ठ अधिकाऱ्याने दिली. त्यासाठी आधार कार्ड, भाडेकरू म्हणून असलेली कागदपत्रे द्यावी लागणार आहेत.
---
१५० दिवसांत दोन हजार इमारती
म्हाडाकडून ऑक्टोबर-नोव्हेंबरमध्ये सेस इमारतीमधील रहिवाशांच्या बायोमेट्रिक सर्वेक्षणाला सुरुवात केली जाणार आहे. त्यानुसार १५० दिवसांत म्हणजे पाच महिन्यांत दोन हजार इमारतींमधील रहिवाशांचे सर्वेक्षण केले जाणार आहे. त्यासाठी लवकरच एजन्सीची नेमणूक केली जाणार आहे.
---
एका क्लिकवर डेटा
सध्या सेस इमारतीचा पुनर्विकास करायचा असेल तर तेथील भाडेकरू कोण, त्यांची पात्रता निश्चित करण्यास बराच वेळ जातो. तसेच गलेलठ्ठ फायली तयार होतात; मात्र बायोमेट्रिक सर्वेक्षणानंतर रहिवाशांचा संपूर्ण डेटा एका क्लिकवर उपलब्ध होणार आहे.