सकाळ वृत्तसेवा
मुंबई, ता. १६ : मध्य रेल्वेने मुंबई विभागातील सहा वारसास्थळ स्थानकांवर बुधवारी (ता. १६) ‘स्टेशन महोत्सव’अंतर्गत विविध उपक्रम केले. या माध्यमातून रेल्वेचा इतिहास, परंपरेला उजाळा देताना विविध उपक्रम करण्यात आले.
रेल्वेच्या शतकपूर्ती समारंभानिमित्त मध्य रेल्वेच्या पाचही विभागांतील एकूण १५ स्थानकांची स्टेशन महोत्सवासाठी निवड करण्यात आली आहे. त्यानुसार मुंबई विभागातील सहा स्थानकांमध्ये विविध उपक्रम करण्यात आले. सीएसएमटी स्थानकावरील हेरिटेज प्रदर्शन या महोत्सवाचे मुख्य आकर्षण ठरले. यामध्ये ग्रेट इंडियन पेनिन्सुला रेल्वे (जीआयपीआर) युगातील पितळी घंटा, कर्मचाऱ्यांचे बॅज, जुने लॅम्प पोस्ट, हँड सिग्नल लॅम्प, बॉल-टोकन मशीन, लाकडी खुर्च्या, कोट-छत्री स्टँड, पेंडुलम घड्याळे अशा अनेक ऐतिहासिक वस्तूंचा समावेश करण्यात आला होता. स्टीम इंजिन, लाकडी डबे आणि सीएसएमटी हेरिटेज इमारतीची रंगीत प्रकाश योजनेत सजवलेली प्रतिकृती आकर्षणाचा केंद्रबिंदू ठरली. वंदे भारत एक्स्प्रेस आणि प्रस्तावित बुलेट ट्रेनचे मॉडेल्स आधुनिकतेचे दर्शन घडवणारे ठरले. व्हीआर ऑकुलसच्या साहाय्याने ३६० अंशातील सीएसएमटीचा आभासी दौरा पर्यटकांनी अनुभवला. प्रदर्शनात रेल्वेच्या प्रगतीचा आढावा घेणारे चार्ट, छायाचित्रे, माहितीपूर्ण पोस्टर्सही प्रदर्शित करण्यात आले. श्वेत-श्याम छायाचित्रांची डायरी, टी-शर्ट, कॉफी मग, चावीचे रिंग यांसारखी रेल्वे स्मृतिचिन्हे विक्रीसाठी उपलब्ध होती.

रांगोळीतून इतिहासाचे स्मरण
सीएसएमटीच्या उपनगरीय सभागृहात रेल्वेवरील संकल्पनेवर आधारित आकर्षक रंगोळी साकारण्यात आली. सकाळी ११ ते सायंकाळी सहा या वेळेत सुरू असलेल्या प्रदर्शनाला विद्यार्थ्यांपासून प्रवाशांनी भरभरून प्रतिसाद दिला.

या स्थानकांचा समावेश
छत्रपती शिवाजी महाराज टर्मिनस (सीएसएमटी) स्थानकासह रे रोड, आसनगाव, वासिंद, कसारा आणि इगतपुरी स्थानकांवरही सजावट, श्रमदान, वृक्षारोपण आणि इतर सामाजिक उपक्रमांचे आयोजन करण्यात आले. प्रत्येक ठिकाणी तयार करण्यात आलेल्या सेल्फी पॉइंट्समुळे नागरिकांनी उत्स्फूर्त सहभाग घेतला.

वारसास्थळांचा गौरव
शतकपूर्ती म्हणजे केवळ भूतकाळाचा गौरव नव्हे, तर पुढील पिढ्यांसाठी प्रेरणादायक ठरावा, असा रेल्वे प्रशासनाचा हेतू आहे. या स्थानकांनी गेली शंभर वर्षे रेल्वे प्रवाशांची सेवा करताना भारतीय रेल्वेच्या वाटचालीत मोलाचे योगदान दिले आहे.