कृत्रिम बुद्घिमत्ता केंद्राचे
मुंबई विद्यापीठात उद्‍घाटन
आजारांचे निदान आणि उपाययोजनांसाठी उपयोगी
सकाळ वृत्तसेवा
मुंबई, ता. १५ : मुंबई विद्यापीठाने आरोग्यसेवेच्या बळकटीकरणासाठी पुढाकार घेत अत्याधुनिक ‘आर्टिफिशियल इंटेलिजन्स सेंटर ऑफ एक्सलन्स’ केंद्र स्थापन केले. या केंद्राचे आज विविध मान्यवरांच्या हस्ते उद्‍घाटन करण्यात आले. कृत्रिम बुद्धिमत्तेच्या आधारे रोगांचे निदान आणि प्रतिबंधात्मक उपाययोजना करण्यासाठी या केंद्राचे महत्त्व अधोरेखित होणार आहे.
मुंबई विद्यापीठाच्या माहिती तंत्रज्ञान विभागात हे अद्ययावत केंद्र स्थापन करण्यात आले आहे. या केंद्राच्या उद्‍घाटनप्रसंगी केंद्रीय उच्चशिक्षण मंत्रालयातील अतिरिक्त सचिव डॉ. सुनीलकुमार बर्णवाल, टाटा मेमोरिअल सेंटरचे संचालक डॉ. सुदीप गुप्ता, मुंबई विद्यापीठाचे कुलगुरू प्रा. रवींद्र कुलकर्णी, वैद्यकीय शिक्षण सहसंचालक डॉ. पल्लवी सापळे, नानावटी रुग्णालयाचे डॉ. हेमंत टोणगावकर आदी उपस्थित होते.
विद्यापीठातील हे केंद्र सुरुवातीला पीसीओएस आणि स्तनाचा कर्करोगाचा अभ्यास करणार आहे. त्यासाठी एआय मॉडेल्सना महत्त्वाच्या निकषांनुसार प्रशिक्षित करण्यात आले. सध्याच्या तुलनात्मक अभ्यासात ९० टक्के अचूकता दिसली, तर दुसरीकडे स्तनाच्या कर्करोगाच्या मॅमोग्राफिक प्रतिमांना प्रशिक्षित करण्यासाठी आणि त्यांची चाचणी घेण्यासाठी डीप लर्निंग मॉडेल्सचा वापर करण्यात आला. त्यात ९७ टक्के अचूकता मिळाली.