अमली पदार्थ विक्रेत्याचे अपहरण
उत्तर प्रदेशातून सुटका; अपहरणामागे छोटा शकीलचा भाऊ अन्वरचा हात

मुंबई, ता. १६ : अमली पदार्थ तस्कर साजिद इलेक्ट्रिकवाला आणि त्याच्या साथीदाराचे आर्थिक व्यवहारातून अपहरण करणाऱ्या टोळीतील सात जणांना उत्तर प्रदेश, रायगड आणि मुंबईतून अटक करण्यात आली. तसेच या कारवाईत साजिदची सुखरूप सुटका करण्यात आल्याचे गुन्हे शाखेचे उपायुक्त राज तिलक रोशन यांनी बुधवारी (ता. १६) सांगितले. हे अपहरणनाट्य कुख्यात छोटा शकीलचा भाऊ अन्वर याच्या आदेशाने घडल्याची माहिती प्राथमिक चौकशीतून गुन्हे शाखेला मिळाल्याचे विश्वसनीय सूत्रांकडून समजते.

सरवर खान, मेहताब अली, संतोष वाघमारे, राहुल सावंत, सतीश कडू, युनिस तेवरपिल्ली आणि तौफीक अशी अटक आरोपींची नावे आहेत. २०१५ मध्ये साजिद आणि साथीदारांनी अंधेरीच्या लोखंडवाला संकुलातील निवासी इमारतीत एका सदनिकेमध्ये एमडी हा अमली पदार्थ निर्मितीसाठी कारखाना सुरू केला होता. राज्य दहशतवादविरोधी पथकाने (एटीएस) हा कारखाना उद्ध्वस्त करीत तब्बल १५१ किलो तयार एमडी जप्त केले होते. त्या प्रकरणात साजिदला अटक करण्यात आली होती. या प्रकरणातून बाहेर पडल्यावर अटक आरोपी सरवरने साजिदला एमडी निर्मिती कारखाना सुरू करण्यासाठी ५० लाख रुपये दिले होते; मात्र ती रक्कम घेऊन कारखाना सुरू न केल्याने आणि ती रक्कमही परत न केल्याने सरवरने छोटा शकीलचा भाऊ अन्वरच्या मदतीने १२ जून रोजी अंधेरी परिसरातील एका हॉटेलमधून साजिद आणि त्याच्या इस्टेट एजंट साथीदाराचे अपहरण केले.

अपहरणकर्त्यांच्या तावडीतून निसटला
अपहरणकर्त्यांनी या दोघांना महिनाभर रायगड, नाशिक, मध्य प्रदेश, उत्तर प्रदेश आणि दिल्ली येथील ठिकाणी ठेवले. या दोघांना बेदम मारहाण करीत लाखो रुपयांची खंडणी उकळली. गेल्या आठवड्यात साजिदचा साथीदार अपहरणकर्त्यांच्या तावडीतून निसटला आणि थेट गुन्हे शाखेत तक्रारीसाठी धडकला. गुरुवारी (ता. १०) याप्रकरणी ओशिवरा पोलिस ठाण्यात गुन्हा नोंदवून गुन्हे शाखेने अपहरणकर्त्यांची शोधमोहीम आरंभली होती.