सशस्त्र दरोडे घालणारा शिवा शेट्टी अटकेत
मुंबई, ता. १७ : नांदेड आणि लातूर येथे सशस्त्र दरोडे घालून तब्बल सहा कोटींची रोकड लुटणारा सराईत गुन्हेगार शिवा शेट्टी याला आरे पोलिसांनी बुधवारी (ता. १६) अटक केली. पुढील तपासासाठी त्याचा ताबा नांदेड पोलिसांना देण्यात आला आहे.
शेट्टी मुंबई पोलिसांच्या अभिलेखावरील गुन्हेगार असून, पश्चिम उपनगरात त्याची संघटित टोळी आहे. २०१९ मध्ये मुंबई पोलिसांनी त्याच्या विरोधात मोक्कानुसार कारवाई केली होती. चार वर्षांनी जामिनावर सुटताच त्याच्या गुन्हेगारी कारवाया पुन्हा सुरू झाल्या. यावर्षी सुरुवातीला नांदेड आणि लातूर येथे वित्तीय संस्थांची रोख रक्कम वाहून नेणारी वाहने अडवून सशस्त्र दरोडे घातले. या दोन्ही गुन्ह्यांत मिळून एकूण सहा कोटी रुपये लुटण्यात आले होते.
दोन्ही जिल्ह्यातील पोलिस त्याच्या मागावर होते; मात्र मोबाईल न वापरता ठावठिकाणा सतत बदलता ठेवून शेट्टी पोलिसांना गुंगारा देत होता. अखेर आरे पोलिस ठाण्याचे वरिष्ठ निरीक्षक रवींद्र पाटील यांना प्राप्त गोपनीय माहितीच्या आधारे शेट्टी याला बुधवारी अटक करण्यात आली.