४९ हजार ५६२ शिक्षकांना टप्पा अनुदान मंजूर
संघटनांमध्ये जल्लोषाचे वातावरण

मुंबई, ता. १८ ः राज्यातील खासगी विनाअनुदानित व अंशतः अनुदानित शाळा, तुकड्या आणि त्यामध्ये कार्यरत असलेल्या तब्बल ४९ हजार ५६२ शिक्षक, शिक्षकेतर शालेय शिक्षणमंत्री दादा भुसे यांनी आज टप्पा अनुदान जाहीर केले आहे. विधानसभेत यासाठीचे निवेदन सादर करून त्यांनी ही माहिती सभागृहापुढे दिली.
शिक्षकांच्या या टप्पा अनुदानासाठी ९७०.४२ कोटी रुपये इतक्या खर्चास राज्य शासनाने मान्यता दिली असल्याची माहितीही त्यांनी दिली. भुसे यांनी विधानसभेत सादर केलेल्या निवेदनानंतर राज्यातील शिक्षक आणि शिक्षक संघटनांमध्ये एकच जल्लोषाचे वातावरण निर्माण झाले आहे. पावसाळी अधिवेशनाच्या अखेरच्या दिवशी का असेना सरकारने या वेळी आमचा शब्द पाळला, अशा प्रतिक्रिया शिक्षक संघटनांकडून दिल्या जात आहेत. पावसाळी अधिवेशनाच्या पार्श्वभूमीवर राज्यातील शेकडो शिक्षकांनी मागील आठवड्यात आझाद मैदानात ठिय्या आंदोलन केले होते. सरकारने त्यांना टप्पा अनुदान जाहीर करण्याच्या आश्वासन दिले होते. त्याप्रमाणे शालेय शिक्षणमंत्री दादा भुसे यांनी विधानसभेत टप्पा अनुदानासंदर्भातील निवेदन सादर करून राज्यातील हजारो शिक्षकांना मोठा दिलासा दिला आहे.
...
१ ऑगस्टपासून लागू
राज्यातील खासगी विनाअनुदानित व अंशतः अनुदानित सहा हजार ७५ शाळा आणि नऊ हजार ६३१ तुकड्यांमधील ४९ हजार ५६२ शिक्षकांना लाभ होणार आहे. याशिवाय दोन हजार ७१४ शिक्षक आणि शिक्षकेतर कर्मचाऱ्यांना नव्याने २० टक्के अनुदान देण्यात येणार आहे. हे वेतन अनुदान १ ऑगस्ट २०२५ पासून लागू होणार आहे. शालेय शिक्षण विभागाकडे विविध संस्थांच्या माध्यमातून आलेल्या अनुदानाच्या निकषानुसार अपात्र होणाऱ्या शाळा व तुकड्यांना स्वयंअर्थसहाय्यित अधिनियमांच्या तरतुदीनुसार विवक्षित शाळा म्हणून घोषित करण्यास मान्यता देण्यात आल्याची माहितीही या वेळी देण्यात आली.