गणेशोत्सवासाठी
पाच विशेष गाड्या
२३ जुलैपासून आरक्षण सुरू
मुंबई, ता. १९ : गणेशोत्सवाच्या पार्श्वभूमीवर कोकणात जाणाऱ्या प्रवाशांची वाढती गर्दी लक्षात घेता पश्चिम रेल्वेने पाच विशेष गाड्या चालविण्याचा निर्णय घेतला आहे. या गाड्या मुंबई सेंट्रल-ठोकूर, मुंबई सेंट्रल-सावंतवाडी रोड, वांद्रे टर्मिनस-रत्नागिरी, बडोदा-रत्नागिरी आणि विश्वामित्री-रत्नागिरी या मार्गांवर धावणार आहेत. या विशेष गाड्यांमुळे पश्चिम उपनगरातील प्रवाशांना मोठा दिलासा मिळणार आहे. या गाड्यांचे आरक्षण २३ जुलैपासून सुरू होणार आहे.
---
कधी धावणार गाड्या?
१. रेल्वे क्रमांक ०९०११/१२ मुंबई सेंट्रल-ठोकूर ही साप्ताहिक विशेष गाडी २६ ऑगस्ट आणि २ सप्टेंबर रोजी सकाळी ११.३० वाजता मुंबई सेंट्रल येथून सुटेल आणि ठोकूर येथे दुसऱ्या दिवशी सकाळी ८.५० वाजता पोहोचेल. परतीच्या मार्गावर ही गाडी २७ ऑगस्ट आणि ३ सप्टेंबरला सकाळी ११ वाजता ठोकूर येथून सुटेल आणि दुसऱ्या दिवशी सकाळी ७.१५ वाजता मुंबई सेंट्रल येथे पोहोचेल.
२. रेल्वे क्रमांक ०९०१९/२० मुंबई सेंट्रल-सावंतवाडी रोड या गाडीच्या एकूण २० फेऱ्या होणार असून, २२ ऑगस्ट ते ७ सप्टेंबरदरम्यान ही गाडी रविवार, बुधवार, शुक्रवार आणि शनिवार या दिवशी सकाळी ११.३० वाजता मुंबई सेंट्रल येथून सुटून रात्री २.३० वाजता सावंतवाडीला पोहोचेल. परतीचा प्रवास २३ ऑगस्ट ते ८ सप्टेंबरदरम्यान रविवारी, सोमवारी, गुरुवारी आणि शनिवारच्या पहाटे ४.५० वाजता सुरू होईल आणि मुंबई सेंट्रल येथे रात्री ८.१० वाजता आगमन होईल.
३. रेल्वे क्रमांक ०९०१५/१ वांद्रे टर्मिनस-रत्नागिरी ही साप्ताहिक गाडी २१ ऑगस्ट ते ४ सप्टेंबरदरम्यान प्रत्येक गुरुवारी दुपारी २.२० वाजत वांद्रे टर्मिनस येथून सुटून रत्नागिरी येथे रात्री १२.३० वाजता पोहोचेल. परतीसाठी २२ ऑगस्ट ते ५ सप्टेंबरदरम्यान प्रत्येक शुक्रवारी रात्री १.३० वाजता रत्नागिरीहून सुटून दुपारी १२.३० वाजता वांद्रे टर्मिनस येथे पोहोचेल.
४. रेल्वे क्रमांक ०९११३/१४ बडोदा-रत्नागिरी आणि रेल्वे क्रमांक ०९१०९/१० विश्वामित्री-रत्नागिरी एक्स्प्रेस या मार्गांवरदेखील गणेशोत्सवासाठी विशेष गाड्या चालविण्यात येणार आहेत. गणेशभक्तांसाठी ही विशेष रेल्वेसेवा अत्यंत उपयुक्त ठरणार असून, कोकणातील गावी जाणाऱ्या प्रवाशांसाठी ही आनंदाची बातमी आहे. रेल्वेने वेळापत्रक, प्रवासाचा कालावधी आणि आरक्षणासाठी संबंधित संकेतस्थळावर अधिकृत माहिती पाहण्याचे आवाहन केले आहे.