मुंबई विद्यापीठात अत्याधुनिक ई-कंटेंट स्टुडिओ
इनोप्राक्तिका, मॉस्को राज्य विद्यापीठाच्या सहकार्याने उभारलेल्या सुविधेचे उद्‍घाटन

मुंबई, ता. २३ : मुंबई विद्यापीठ आणि रशियामधील मॉस्को स्टेट विद्यापीठ यांच्यात विविध शैक्षणिक आणि संशोधन उपक्रमांकरिता असलेल्या कराराअंतर्गत, इनोप्राक्तिका मॉस्को स्टेट विद्यापीठाने मुंबई विद्यापीठाला दिलेल्या निधीतून विद्यापीठात उच्च दर्जाचे ई-कंटेंट स्टुडिओ आणि ऑडिटोरिअम उभारण्यात आले आहे.

दर्जेदार शैक्षणिक सामग्रीच्या निर्मितीसाठी उपयुक्त ठरणाऱ्या या दोन्ही सुविधा विद्यापीठाच्या कलिना संकुलातील शंकरराव चव्हाण शिक्षक प्रशिक्षण अकादमी इमारतीत बुधवारी (ता. २३) कार्यान्वित करण्यात आल्या आहेत. विद्यापीठ अनुदान आयोगाचे सचिव प्रा. मनीष जोशी (आभासी पद्धतीने), रशियाचे काऊन्सुल जनरल इवान फेटिसोव, मुंबई विद्यापीठाचे कुलगुरू प्रा. रवींद्र कुलकर्णी, रशियन हाउसच्या डॉ. एलेना रेमीझोवा, विक्टर गोरेलीख, विद्यार्थी विकास विभागाचे संचालक डॉ. सुनील पाटील आणि युरेशिअन स्टडीजचे प्रा. संजय देशपांडे यांच्या उपस्थितीत या सुविधेचे उद्‍घाटन करण्यात आले. मॉस्को, रशिया येथील आर्ट-पॉडगोटोव्हका या स्वायत्त बिगर-व्यावसायिक संस्थेने या सुविधेच्या निर्मितीसाठी ३० लाखांचे अनुदान विद्यापीठास दिले आहे. ई-कंटेंट स्टुडिओच्या मदतीने शिक्षक प्रशिक्षणामध्ये आमुलाग्र बदल घडविणे आणि विद्यार्थ्यांसाठी शैक्षणिक आशय वृद्धीसाठी याचा मोठा फायदा होणार आहे. उच्च-गुणवत्तेच्या डिजिटल शैक्षणिक संसाधनांच्या निर्मितीसाठी प्रगत तंत्रज्ञानाने सुसज्ज असा हा ई-कंटेंट स्डुडिओ आहे. दरम्यान, या उद्‍घाटनप्रसंगी आपले मनोगत व्यक्त करताना विद्यापीठ अनुदान आयोगाचे सचिव प्रा. मनीष जोशी यांनी मुंबई विद्यापीठाने ई-लर्निंग, ऑनलाइन अभ्यासक्रम, मूक्स आणि स्वयंमसाठी घेतलेल्या पुढाकाराबद्दल विद्यापीठाचे अभिनंदन केले.

अद्ययावत ऑडिटोरिअम
व्यावसायिक दर्जाच्या चित्रफीत तयार करण्यासाठी उच्च गुणवत्तायुक्त दृक श्राव्य उपकरणे, ई-सामग्री संपादन व निर्मितीसाठी प्रगत सॉफ्टवेअर व हार्डवेअर, टेलिप्राम्पटर व क्रोमा की, व्याख्यान ध्वनिमुद्रण व थेट प्रसारण आणि ई-सामग्री संचयन व व्यवस्थापनाच्या सुविधायुक्त हा प्रगत ई-कंटेट स्डुडिओ आहे. तसेच अद्ययावत सुविधायुक्त ऑडिटोरिअम सुविधाही या वेळी कार्यान्वित करण्यात आली.