अल्पवयीन मुलीवर वर्षभर लैंगिक अत्याचार
वडील, भावांसह चौघांवर कारवाई

मुंबई, ता. २३ ः शहराच्या पूर्व उपनगरात राहणाऱ्या अल्पवयीन मुलीवर (वय १४) वडील, दोन सख्ख्या भावांसह चौघांनी वर्षभर लैंगिक अत्याचार केल्याची धक्कादायक घटना उघडकीस आली. गेल्या वर्षी याच मुलीवर परिसरातील चार तरुणांनी लैंगिक अत्याचार केले होते. त्यातून ही मुलगी गर्भवती झाली व तिने बाळाला जन्मही दिला. त्यानंतर आता हा प्रकार उघड झाला.
स्थानिक पोलिसांनी गेल्या वर्षी डिसेंबर महिन्यात परिसरातील चार आरोपींविरोधात पहिला गुन्हा नोंदवून कारवाई केली. तपासादरम्यान पीडित मुलगी गर्भवती असल्याचे स्पष्ट होताच पोलिसांनी तिला बालसुधारगृहात पाठवले. तेथे तिची प्रसूती झाली. या काळात सुधारगृहातील कर्मचाऱ्यांनी तिची काळजी घेतली. भावनिक नाते निर्माण झाल्याने विश्वास बसल्याने या मुलीने जन्मदाते वडील, दोन सख्खे भाऊ आणि परिसरातील एका फेरीवाल्याने तब्बल वर्षभर लैंगिक अत्याचार केल्याचे गुपित खुले केले. तिची कहाणी ऐकून सुधारगृहातील अधिकारी, कर्मचाऱ्यांना धक्का बसला. त्यांनी तातडीने ही बाब बालकल्याण समितीच्या कानी घातली. समितीने मुलीकडे चौकशी करून स्थानिक पोलिसांना बोलावून घेतले. पोलिसांनी या मुलीचा जबाब नोंदवला. तपासात तिने केलेले आरोप खरे असल्याचे स्पष्ट होताच पोलिसांनी वडील, भावांसह चौघांवर २१ जुलैला स्वतंत्र गुन्हा नोंदवला.
...
आरोपींना अटक
पोलिस ठाण्यातून मिळालेल्या माहितीनुसार, मुलीचे वडील, एक भाऊ आणि फेरीवाल्यास अटक करण्यात आली. एक आरोपी अल्पवयीन असल्याने त्याला सुधारगृहात पाठवण्यात आले आहे. मुलीचे वडील, भावांना गुन्हेगारी पार्श्वभूमी आहे. त्यांच्याविरोधात चोरी, मारहाणीचे गुन्हे नोंद आहेत.