बनावट व्हिसामुळे हज यात्रा हुकली
अमरावतीच्या ३० जणांची फसवणूक

मुंबई, ता. २३ ः कुर्ला येथील ट्रॅव्हल एजंटने १५ लाख घेऊन बनावट व्हिसा हाती ठेवल्याने अमरावतीच्या ३० यात्रेकरूंची हज यात्रा हुकली. यात्रा हुकल्याने त्यांना मनस्ताप झालाच, मात्र व्हिसा आणि तिकिटासाठी कसेबसे गोळा केलेले पैसेही वाया गेले. याप्रकरणी ट्रॅव्हल एजंट सोहेल खान यास शहर पोलिसांनी फसवणुकीचा गुन्हा नोंदवून अटक केली.
बनावट व्हिसाच्या आधारे प्रवास करू पाहणाऱ्या ३० प्रवाशांना एकाच वेळी विमानतळावर रोखण्याचीही पहिलीच खेप असल्याचे सांगण्यात आले. इमिग्रेशन अधिकारी गणेश गवळी यांच्या सतर्कतेमुळे हा प्रकार उघडकीस आला. २१ जुलैला मध्यरात्री ही मंडळी अमरावतीहून मुंबई आंतरराष्ट्रीय विमानतळावर दाखल झाली. इमिग्रेशन अधिकाऱ्यांना त्यांनी एकेक करून व्हिसा दाखवण्यास सुरुवात केली. इमिग्रेशन अधिकारी गवळी यांना त्या व्हिसावरील क्रमांकावरून संशय निर्माण झाला. सर्वांचे व्हिसा क्रमांक मिळतेजुळते होते. व्हिसावरील बार कोड स्कॅन करून पाहिला तेव्हा प्रत्येक वेळेस कुरेशी या एकाच व्यक्तीचे नाव पुढे येत होते. त्यावरून ही सर्व व्हिसा बनावट असल्याचे स्पष्ट झाले. त्यानंतर या सर्व यात्रेकरूंकडे चौकशी करण्यात आली. त्यांच्यासोबत त्यांचा अमरावती येथील समन्वयक होता. त्याने कुर्ला येथील अल इज्मा टूर्सचा मालक सोहेल यांच्याकडे व्हिसा तयार करण्यास दिले होते, असे सांगितले. त्यानुसार इमिग्रेशन अधिकाऱ्यांनी सर्वांना शहर पोलिस ठाण्यात आणले. तेथे सोहेलविरोधात गुन्हा नोंदवण्यात आला.