बलात्कारप्रकरणी फाशीची शिक्षा रद्द
तज्ज्ञांची साक्ष न नोंदवल्याबाबत उच्च न्यायालयाचा आक्षेप
सकाळ वृत्तसेवा
मुंबई, ता. २३ ः पुण्यात २०२१ मध्ये अडीच वर्षीय मुलीची बलात्कार करून हत्या केल्याप्रकरणी विशेष न्यायालयाने आरोपीला सुनावलेली फाशीची शिक्षा बुधवारी (ता.२३) उच्च न्यायालयाने रद्द केली. विशेष न्यायालयाने वैज्ञानिक पुरावे तपासताना या विषयातील स्वतंत्र तज्ज्ञांची साक्ष नोंदवली नाही. तसेच कनिष्ठ न्यायालयाने याप्रकरणी अंतिम युक्तिवाद पुन्हा ऐकण्याचे आणि खटल्यावर शक्य तेवढ्या लवकर नव्याने निर्णय घेण्याचे आदेशही न्या. सारंग कोतवाल आणि न्या. श्याम चांडल यांच्या खंडपीठाने विशेष न्यायालयाला दिले.
उच्च न्यायालयाने यासंदर्भात सर्वोच्च न्यायालयाच्या निकालांचा दाखला देताना हा खटला वैज्ञानिक पुराव्यावर विशेषतः डीएनए अहवालावर आधारित होता, परंतु, विशेष न्यायालयाने या विषयाची संबंधित स्वतंत्र तज्ज्ञांची साक्षच नोंदवली नाही, त्यामुळे हा खटल्याच्या निकालावर परिणाम झाल्याचे फाशीची शिक्षा रद्द करताना न्यायालयाने म्हटले. फाशीच्या शिक्षेशी संबंधित हा खटला असल्याने, आरोपीला कनिष्ठ न्यायालयासमोरच पुराव्याच्या सर्व पैलूंवर, त्यासह अतिरिक्त पुराव्यांवर बाजू मांडण्याची संधी देणे अत्यावश्यक आहे. तसे न केल्यास हे त्याच्या आरोपी म्हणून असलेल्या अधिकारांचे उल्लंघन केल्यासारखे होईल, असे उच्च न्यायालयाने निकालात नमूद केले आणि नव्याने युक्तिवाद ऐकून गुणवत्तेच्या आधारावर पुन्हा निर्णय घेण्याचे आदेश कनिष्ठ न्यायालयाला दिले. निकालात नोंदवलेल्या कोणत्याही निरीक्षणाच्या प्रभावाखाली न येता कनिष्ठ न्यायालयाने नव्याने सुनावणी घ्यावी, असेही न्यायालयाने स्पष्ट केले. तसेच, १२ ऑगस्ट रोजी आरोपीला न्यायालयासमोर हजर करून नव्याने प्रकरणावर कार्यवाही सुरू करण्याचे आदेशही दिले.