अकरावीच्या तिसऱ्या फेरीत सव्वा लाख प्रवेश

मुंबई, ता. २४ ः अकरावी ऑनलाइन प्रवेश प्रक्रियेच्या तिसऱ्या कॅप आणि कोट्यातील प्रवेशाच्या तिसऱ्या फेरीची गुणवत्ता यादी आज जाहीर झाली. यात एक लाख २२ हजार २३५ विद्यार्थ्यांना प्रवेश ॲलॉट झाले आहेत. ज्या विद्यार्थ्यांना पसंतीक्रमानुसार प्रवेश झाले आहेत, त्यांना २५ ते २६ जुलैदरम्यान संबंधित कनिष्ठ महाविद्यालयांमध्ये जाऊन प्रवेश घेणे बंधनकारक असेल.
अकरावीच्या नियमित तिसऱ्या फेरीसाठी १३ हजार ६२१ विद्यार्थ्यांनी नवीन नोंदणी केली होती, तर कॅप प्रवेशासाठी चार लाख १० हजार ४९८ विद्यार्थ्यांनी अर्जाचा भाग दोन, पसंतीक्रम दिलेले आहेत. तसेच ८२ हजार ९५२ विद्यार्थ्यांनी अर्जाचा भाग दोन, पसंतीक्रम कोटा अंतर्गत (अल्पसंख्याक, इन-हाउस, व्यवस्थापन) प्रवेशासाठी दिलेले होते, त्यातील एक लाख २२ हजार २३५ विद्यार्थ्यांना प्रवेश ॲलॉट झाले आहेत.
अकरावीच्या चौथ्या फेरीत कॅप व कोटाअंतर्गत प्रवेशासाठी २८ जुलै रोजी सकाळी १०.०० वा ते २९ जुलै सायंकाळी ६.३० वाजेपर्यंत नवीन नोंदणी, अर्ज भरण्याची प्रक्रिया होईल. ३० अथवा ३१ ऑगस्ट रोजी गुणवत्ता यादी जाहीर होईल आणि त्यानंतर १ ते २ ऑगस्टदरम्यान विद्यार्थ्यांना संबंधित महाविद्यालयांमध्ये जाऊन प्रवेश घेता येतील.