ओला- उबरचालकांचा प्रश्न मुख्यमंत्र्यांच्या दरबारी 

मुंबई, ता. २६ : विविध मागण्यांसाठी ओला- उबरचालकांनी आंदोलन केले; मात्र या मागण्यांबाबत परिवहन विभागाकडून अद्यापही तोडगा न निघाल्याने ओला- उबरचालक संघटना लवकरच मुख्यमंत्र्यांची भेट घेऊन त्यांना आपले गाऱ्हाणे मांडणार असल्याची माहिती महाराष्ट्र ॲप-बेस्ड ट्रान्स्पोर्ट वर्कर्स युनियनने दिली. 
या युनियनचे अध्यक्ष प्रशांत सावर्डेकर म्हणाले, की ओला- उबरचालकांच्या  प्रश्नांबाबत आंदोलन  करण्यात आले; मात्र त्याला  परिवहन विभागाकडून सकारात्मक प्रतिसाद मिळाला नाही. त्यातच उबर कंपनी न्यायालयात गेली, त्यामुळे आंदोलन थांबविण्यात आले आहे; मात्र या प्रश्नांवर तोडगा काढण्यासाठी लवकरच मुख्यमंत्र्याची भेट घेणार आहोत.    राज्यातील ओला- उबरसारख्या ॲप आधारित वाहन व्यवसायाशी निगडित टॅक्सी-रिक्षा तसेच प्रवासी वाहनांचे मालक-चालकांची तसेच स्विगी, झोमॅटोसारख्या अन्नपदार्थ पोहोचविणाऱ्या रायडर्सची तसेच फलाट कामगारांना कामगाराचा दर्जा मिळावा, तर केंद्र सरकारच्या धर्तीवर तसेच सोशल सिक्युरिटी कोड-२०२०नुसार या कामगारांसाठी स्वतंत्र कल्याण महामंडळाची स्थापना करून या कामगारांना वैद्यकीय विमा, जीवन विमा, वैद्यकीय सेवासुविधा तसेच पी.एफ., ग्रॅज्युईटी, पेन्शन, शैक्षणिक, गृह इत्यादी सुविधा पुरविण्यात याव्या,  या प्रमुख मागण्या आहेत.