ज्येष्ठ नागरिकांना लुबाडणाऱ्यास अटक
अंधेरी पोलिसांची इगतपुरी येथे कारवाई; मुंबईत ४० गुन्हे नोंद

मुंबई, ता. २६ : रस्त्यावरून पायी जाणाऱ्या ज्येष्ठ नागरिकांना लक्ष्य करीत अगदी सहजरीत्या लुबाडणाऱ्या तरुणास अंधेरी पोलिसांनी पश्चिम बंगालच्या दिशेने निघालेल्या एक्स्प्रेसमधून इगतपुरी स्थानकात अटक केली. अन्वर शेख ऊर्फ मुन्नावर असे या आरोपीचे नाव असून, शहरातील विविध पोलिस ठाणी तब्बल ४० गुन्ह्यांमध्ये त्याच्या मागावर होती.

कुर्ला येथे राहणारा शेख गेल्यावर्षी तुरुंगातून सुटला होता. त्यानंतर त्याने पुन्हा ज्येष्ठ नागरिकांना रस्त्यात अडवून बोलण्यात गुंतवून त्यांचे दागिने हिसकावण्याचे गुन्हे सुरू केले. १५ जुलै रोजी अंधेरीच्या तेली गल्ली येथे एका ज्येष्ठ नागरिकाची सुमारे तीन तोळ्यांची चेन पाहण्याच्या बहाण्याने घेऊन त्याने पळ काढला होता. उपायुक्त दत्ता नलावडे यांनी हा गुन्हा गांभीर्याने घेत तपासाचे आदेश दिले. त्यानुसार अंधेरी पोलिस ठाण्याच्या पथकाने सीसीटीव्ही तपासले. चित्रणात आरोपीने छत्री घेतल्याने त्याचा चेहरा स्पष्ट दिसत नव्हता. पथकाने अन्य हद्दीतील सीसीटीव्ही तपासले असता गेल्या महिन्यात साकीनाका येथे आरोपी स्पष्ट दिसला. तेव्हा शहरातील अन्य पोलिस ठाणीही त्याच्या मागावर असल्याचे स्पष्ट झाले. अंधेरी पोलिस पथकाने गोपनीय माहितीच्या आधारे मोबाईल न वापरणाऱ्या शेख याची माहिती मिळवली. पोलिस मागावर असल्याची कुणकुण लागताच शेख याने तत्काळ तिकीट काढून पश्‍चिम बंगाल येथील गावच्या दिशेने प्रवास सुरू केल्याची नेमकी माहिती पथकाला मिळाली. त्याआधारे इगतपुरी स्थानकात शेख यास ताब्यात घेऊन अटक करण्यात आली.