‘सूर्यघर’च्या कामगिरीसाठी महावितरणचा गौरव

सकाळ वृत्तसेवा
मुंबई, ता. २७ : घरगुती वीजग्राहकांना सुमारे २५ वर्षे मोफत वीज उपलब्ध करून देता यावी, म्हणून प्रधानमंत्री सूर्यघर मोफत वीज योजनेची प्रभावी अंमलबजावणी करणाऱ्या महावितरणचा ‘रेडिओ सिटी बिझनेस टायटन्स अवॉर्ड’ने शनिवारी (ता. २६) थायलंडमध्ये गौरव करण्यात आला.
आतापर्यंत राज्यात दोन लाख ४२ हजार ७१४ घरगुती ग्राहकांच्या छतावर सौरऊर्जा प्रकल्प कार्यान्वित झाले असून, त्याची क्षमता ९१९ मेगावॉट आहे. या योजनेत सहभागी ग्राहकांना आतापर्यंत तब्बल १,६८५ कोटी ४२ लाख रुपयांचे अनुदान दिले असून, त्याची दखल घेत हा पुरस्कार देण्यात आला आहे.
‘विकसित भारत’चे उद्दिष्ट व भविष्यातील भक्कम अर्थव्यवस्थेला चालना देणाऱ्या सुमारे १५० खासगी कंपन्या व सार्वजनिक उपक्रमाच्या कंपन्यांचे संचालक व प्रतिनिधींसाठी फुकेत येथे परिषदेचे आयोजन करण्यात आले होते. या परिषदेत ज्येष्ठ अभिनेते बोमन इराणी यांच्या हस्ते महावितरणला पुरस्कार प्रदान करण्यात आला. महावितरणचे संचालक (मानव संसाधन) राजेंद्र पवार व विशेष कार्य अधिकारी मंगेश कोहाट यांनी हा पुरस्कार स्वीकारला.
प्रधानमंत्री सूर्यघर योजनेत घरगुती ग्राहकांना छतावरील १ ते ३ किलोवॉट क्षमतेच्या सौरऊर्जा प्रकल्पांद्वारे दरमहा सुमारे १२० ते ३६० युनिटपर्यंत वीज मोफत मिळविण्याची संधी आहे. एक किलोवॉटसाठी ३० हजार रुपये, दोन किलोवॉटसाठी ६० हजार रुपये आणि तीन किलोवॉट व त्यापेक्षा जास्त क्षमतेसाठी कमाल ७८ हजार रुपये अनुदान थेट मिळत आहे. विविध बँकांकडून सवलतीच्या व्याजदराने कर्जाची सोय उपलब्ध आहे.