घाटकोपर पूर्वमध्ये भीषण आग
मुंबई : घाटकोपर पूर्वच्या पंतनगर येथील नायडू कॉलनीतील एका सात मजली इमारतीच्या तिसऱ्या मजल्यावर रविवारी (ता. २७) दुपारी सव्वादोन वाजण्याच्या सुमारास भीषण आग लागली. इमारत क्रमांक ३३० मध्ये घडलेल्या या घटनेने परिसरात एकच खळबळ उडली. या घटनेची माहिती मिळताच अग्निशमन दल, स्थानिक पोलिस, १०८ रुग्णवाहिका सेवा, अदाणी इलेक्ट्रिसिटीचे कर्मचारी आणि नागरी वॉर्ड अधिकाऱ्यांनी घटनास्थळी धाव घेतली. या आगीवर दुपारी पावणेतीन वाजण्‍याच्या सुमारास नियंत्रण मिळविण्‍यात अग्निशमन दलाला यश आले. या वेळी अग्निशमन दल आणि रहिवाशांच्या सतर्कतेमुळे मोठा अनर्थ टळला; मात्र या आगीत सदनिकेतील सामान जळून खाक झाले. या आगीचे नेमके कारण अद्याप अस्पष्ट असून अधिक तपास सुरू आहे.