चाकरमान्यांची एसटीला पसंती
गणपतीसाठी पाच दिवसांत २७३ बस आरक्षित
सकाळ वृत्तसेवा
मुंबई, ता. २७ : गणेशोत्सवासाठी एसटी महामंडळ सज्ज झाले असून, महामंडळाच्या मुंबई विभागाने २३ ऑगस्ट ते ७ सप्टेंबरदरम्यान १,८०० जादा गाड्या सोडण्याचे नियोजन केले आहे. यामध्ये आतापर्यंत २७३ बस आरक्षित झाल्याची माहिती एसटीच्या अधिकाऱ्यांनी दिली.

गणपती उत्सवासाठी दरवर्षी कोकणात जाणाऱ्या चाकरमान्यांच्या सेवेसाठी नफ्या-तोट्याचा विचार न करता एसटी धावत असते, मुंबईतून यंदा सुमारे १,८०० जादा गाड्या कोकणासाठी धावतील. या बसचे आरक्षण एसटीच्या अधिकृत संकेतस्थळावर उपलब्ध करून देण्यात येत असून, हे आरक्षण बसस्थानकावर किंवा महामंडळाच्या ॲपव्दारे उपलब्ध करून देण्यात आले आहे. या जादा बसमध्ये व्यक्तिगत आरक्षणाबरोबरच गट आरक्षणासाठी अमृत ज्येष्ठ नागरिकांना १०० टक्के, ज्येष्ठ नागरिकांना व महिलांना ५० टक्के तिकीटदरात सवलत दिली जाणार आहे. गट आरक्षण २२ जुलैपासून सुरू झाले आहे. २३ ऑगस्टपासून मुंबई विभागांतील प्रमुख बसस्थानकातून या जादा बस सोडण्यात येणार आहेत. गतवर्षी कोकणात गणेशोत्सवासाठी १,८०० हुन अधिक बस सोडण्यात आल्या होत्या. त्यातच यंदा गणेशोत्सवादरम्यान एसटीची वाहतूक सुरळीत होण्यासाठी बसस्थानक व बसथांब्यावर एसटीच्या वरिष्ठ अधिकाऱ्यांच्या देखरेखीखाली कर्मचारी अहोरात्र कार्यरत राहणार आहेत, तसेच कोकणातील महामार्गावर ठिकठिकाणी वाहन दुरुस्ती पथकदेखील तैनात करण्यात येणार आहेत.

आगार बस आरक्षण
मुंबई सेंट्रल - ११०
परळ - ८४
कुर्ला - ६६
उरण - ९
पनवेल -४
एकूण - २७३