मुंबई विद्यापीठाचा बृहत आराखडा मंजूर
१५ महाविद्यालये प्रस्तावित

मुंबई, ता. २७ ः मुंबई विद्यापीठाचा २०२६-२७चा बृहत आराखडा रविवारी (ता. २७) अधिसभेत मंजूर करण्यात आला. शैक्षणिक वर्ष २०२४-२५ ते २०२८-२९ या पंचवार्षिक बृहत आराखड्यातील शैक्षणिक वर्ष २०२६-२७ साठी एकूण १३ नवीन बहुविद्याशाखीय कौशल्याधारित महाविद्यालये आणि शैक्षणिक वर्ष २०२४-२५ मधील रिक्त बिंदूतील दोन पारंपरिक उपयोजित महाविद्यालये अशी एकूण १५ महाविद्यालये प्रस्तावित करण्यात आली आहेत.
प्रस्तावित महाविद्यालये दादर पश्चिम, मालाड पश्चिम, मुलुंड पूर्व, कांदिवली पूर्व, शहापूर मोहिली अघाई, अंबरनाथ चरगाव/लवाले, अलिबाग सासवणे/मांडवा, अलिबाग, रत्नागिरी सिटी, दापोली उंबराळे गाव, कुडाळ ओरोस, सफाळे, जव्हार तळवली/वानगाव येथे असतील. तसेच शैक्षणिक वर्ष २०२४-२५मधील रिक्त बिंदूतील भिवंडी येथे बी.एस्सी. (आयटी)-१ आणि गावदेवी डोंगरी, अंधेरी येथे बीए, बीकॉम-१ अशा दोन पारंपरिक उपयोजित महाविद्यालये प्रस्तावित करण्यात आली आहेत. अधिसभेच्या कार्यक्रम पत्रिकेतील मुंबई विद्यापीठाच्या विविध विभाग, केंद्रे, शाळा आणि संस्थांना स्वायत्त दर्जा देण्याबाबतचे परिनियम आणि विविध विभाग, संस्था आणि केंद्रातील विभागप्रमुख व संचालक यांच्या फेरपालटासंदर्भातील परिनियम आजच्या अधिसभेत मंजूर करण्यात आले. त्याचबरोबर विद्यापीठाचे २०२३-२४चे वार्षिक लेखे, ३१ मार्च २०२४चा ताळेबंद, लेखापरीक्षण अहवाल अधिसभेत मंजूर करण्यात आले.