ठाणे-बोरिवली बोगद्यामुळे म्हाडा तोट्यात
प्रकल्पासाठी भूखंड दिल्याने ‘एमएमआरडीए’कडे भरपाईची मागणी

सकाळ वृत्तसेवा
मुंबई, ता. २९ : ‘एमएमआरडीए’कडून उभरल्या जाणाऱ्या ठाणे-बोरिवली दुहेरी बोगद्यामुळे म्हाडाच्या कोकण मंडळाला तब्बल १२३ घरांवर पाणी सोडावे लागले आहे. चितळसर ठाणे येथील ५३ हजार चौरस मीटरपैकी सुमारे सहा हजार चौरस मीटरचा भूखंड बोगद्यालगत असल्याने तो एमएमआरडीएला द्यावा लागला आहे. त्यामुळे विकसकाने म्हाडाला देण्यासाठी उभारलेल्या १,१७३ घरांपैकी १२३ घरे कमी दिली आहेत. परिणामी म्हाडाने नुकत्याच काढलेल्या लॉटरीत कमी घरे उपलब्ध झाली आहेत.

ठाणे शहरालगत असलेल्या मानपाडा चितळसर येथे म्हाडाचा सुमारे ५३ हजार चौरस मीटरचा भूखंड आहे. खासगी विकसकाच्या माध्यमातून भागीदारीतून येथे घरे बांधली आहेत. त्यानुसार एकूण घरांच्या ३५.५ टक्के घरे म्हाडाला दिली जाणार होती, त्यानुसार विकसकाने म्हाडाला द्याव्या लागणाऱ्या हिश्श्याची १,१७३ घरे बांधली; मात्र या भूखंडातील सुमारे सहा हजार चौरस मीटर जागा दुहेरी बोगदा प्रकल्पासाठी आणि रस्त्यासाठी गेली. त्यामुळे विकसकाला मिळणार भूखंडाचा आकार कमी झाल्याने त्याने म्हाडाला देय असलेल्या एकूण घरांपैकी १२३ घरे कमी करून केवळ १,०५० घरे म्हाडाच्या ताब्यात दिली. परिणामी म्हाडाला सुमारे ६० कोटी रुपयांचा फटका बसला आहे.

एमएमआरडीए-म्हाडा आमने-सामने येणार
ठाणे-बोरिवली दुहेरी बोगदा प्रकल्पासाठी म्हाडाने सुमारे सहा हजार चौरस मीटरचा भूखंड दिला आहे. त्याचा मोबदला म्हणून रेडिरेकनरच्या दराने ३५ कोटी रुपये मिळावेत, अशी मागणी म्हाडाने ‘एमएमआरडीए’कडे केली आहे. दोन महिन्यांपूर्वी त्याबाबत एमएमआरडीएला पत्रही दिल्याचे म्हाडाच्या एका वरिष्ठ अधिकाऱ्याने सांगितले. दरम्यान, म्हाडाला ही भूखंड राज्य सरकारकडून मिळालेला आहे. शिवाय दुहेरी बोगदा प्रकल्प राज्य सरकारचाच प्रकल्प आहे. त्यामुळे पैसे देण्याची गरज नसल्याचे ‘एमएमआरडीए’चे म्हणणे आहे. याबाबत म्हाडा राज्य सरकारचा दरवाजा ठोठावणार आहे. त्यामुळे ३५ कोटी रुपयांच्या मोबदल्यावरून म्हाडा आणि एमएमआरडीए आमने सामने येणार असल्याचे दिसत आहे.