रिक्षा, टॅक्सीचालकांना बाइक टॅक्सी नको!
दुचाकीचालक म्हणतात, रोजगाराची चांगली संधी
सकाळ वृत्तसेवा
मुंबई, ता २९ : रिक्षा, टॅक्सी आणि ई-बाइक सेवा आता खासगी कंपन्यांपुरती मर्यादित न राहता परिवहन विभागाच्या सहकार्याने ॲपआधारित टॅक्सीसेवा सुरू केली जाणार आहे. रिक्षा-टॅक्सीचालकांनी या निर्णयाचे स्वागत केले असले, तरी बाइक टॅक्सीला मात्र विरोध दर्शवला आहे. दुसरीकडे बाइक टॅक्सीमुळे तरुणांना रोजगाराची संधी मिळेल, अशी भूमिका दुचाकीचालकांनी मांडली आहे.
प्रवासी वाहतुकीसाठी अ‍ॅपआधारित रिक्षा, टॅक्सी व ई-बाइक सेवेसाठी परिवहन विभागाच्या सहकार्याने ॲप तयार केले जात आहे. केंद्र सरकारच्या अ‍ॅग्रीगेटर मार्गदर्शक तत्त्वानुसार ॲपची नियमावली अंतिम टप्प्यात आहे. सध्या खासगी संस्था अनधिकृत ॲपच्या माध्यमातून प्रचंड नफा कमवतात. सरकारकडे यंत्रणा, तंत्रज्ञान आणि मनुष्यबळ मुबलक प्रमाणात असल्यामुळे सरकारने अशाप्रकारची सेवा सुरू केल्यास त्याचा फायदा प्रवाशांसह चालकांनादेखील होईल, अशी सरकारची भूमिका आहे.
==
रिक्षा, टॅक्सी किंवा बाइक टॅक्सीची पुरेशी साधने उपलब्ध होणे आवश्यक आहे. बाइक टॅक्सी असल्यास प्रवास आणखी सोपा होईल; मात्र त्यासाठी वाहतूक नियमांचे पालन होणे आवश्यक आहे.
- अजय गोवले, वाहतूक अभ्यासक
==
महाराष्ट्र सरकारने प्रवासी वाहतुकीसाठी अ‍ॅपआधारित रिक्षा, टॅक्सी आणि ई-बाइक सेवा सुरू करण्याचा निर्णय स्वागतार्ह आहे; मात्र ई-बाइक सेवेला आमचा तीव्र विरोध आहे.
- के. के. तिवारी, अध्यक्ष भाजप रिक्षा-टॅक्सी सेल
==
सरकारने स्वतःचे मोबाईल अ‍ॅप विकसित करावे, अशी मागणी आम्ही अनेक वर्षांपासून करीत आहोत; परंतु ई-बाइक सेवेमुळे रिक्षा आणि टॅक्सीचालकांवर परिणाम होऊ शकतो.
- बाबा कांबळे, अध्यक्ष, महाराष्ट्र रिक्षा पंचायत आणि ऑटो टॅक्सी ट्रान्सपोर्ट फेडरेशन
===
रिक्षा, टॅक्सी व ई-बाइक सेवेसाठी परिवहन विभागाच्या सहकार्याने अॅप सुरू ही करणे चांगली बाब आहे. त्यामुळे तरुणांना रोजगाराची संधी उपलब्ध होईल.
- हरीश वडेती, बाइक टॅक्सीचालक
===
मुंबई महानगरातील संख्या
ठिकाण - दुचाकी - रिक्षा - टॅक्सी
मुंबई - ३०,४४,६७३ - २,५१,४६१ - ४४,८६२
ठाणे - १६,२१,३२७ - १,३८,६१२- ४,९५९
कल्याण - ११,१०,७१६ - ६९,९३७ - ४,१५६
नवी मुंबई - ३,३३,४९१ - ३९,९८४ - २,६९५
वसई - ७,१०,४०८ - ४०,९६० - १,८२८