रेव्ह पार्टीची संकल्पना गँगवॉरप्रमाणे
कायद्यात उल्लेख, निकष, नियम नाहीत
सकाळ वृत्तसेवा
मुंबई, ता. २९ ः देशातील अमली पदार्थविरोधी कायद्यात (एनडीपीएस) रेव्ह पार्टी संकल्पनेचा कुठेही उल्लेख नाही. प्रत्यक्षात पोलिसी भाषेत अंडरवर्ल्ड, कंपनी, गँगवॉर शब्द प्रचलित झाले, त्याचप्रमाणे ‘रेव्ह पार्टी’ हा शब्दही रूढ झाला, अशी माहिती अनुभवी पोलिस अधिकारी आणि वकील देतात.
पोलिस दलातील निवृत्त अधिकाऱ्याने दिलेल्या माहितीनुसार, कुख्यात दाऊद इब्राहिमचा भाऊ साबीर याची १९८१ मध्ये प्रभादेवी येथील पेट्रोलपंपावर मन्या सुर्वे आणि साथीदारांनी हत्या केली. त्या गुन्ह्याची नोंद करताना, पहिल्यांदा मुंबई पोलिसांनी टोळीयुद्ध अर्थात गँगवॉर शब्दाचा उल्लेख केला; मात्र कट, समाईक हेतू, हत्या आदी नेहमीचीच कलमे जोडली. म्हणजेच तत्कालीन कायद्यात टोळीयुद्धातून घडलेल्या गुन्ह्यांसाठी विशिष्ट कलमांची तरतूद नव्हती. महाराष्ट्र संघटित गुन्हेगारी प्रतिबंधित कायदा (मकोका) अमलात येईपर्यंत टोळीयुद्धातून घडलेली हत्या, संघटित टोळ्यांनी केलेले अपहरण, खंडणीसाठी दिलेली धमकी या गुन्ह्यांसाठी आयपीसीप्रमाणे गुन्हे नोंद होत असे.
एनडीपीएस कायद्यात रेव्ह पार्टीबाबत विशेष तरतूद, निकष आणि नियम नाहीत. या कायद्यानुसार, गांजापासून पार्टी ड्रग्ज, एलएसडीपर्यंत कोणत्याही अमली पदार्थांचे सेवन, विक्री, साठवणूक, वाहतूक, उत्पादन, आदी प्रक्रिया गुन्हा ठरतो. त्यानुसार सार्वजनिक ठिकाणी किंवा खासगी जागेत कोणतीही कृती करणाऱ्या व्यक्तीविरोधात अमली पदार्थ बाळगणे, सेवन करणे गुन्हा असल्याचे एका अन्य अधिकाऱ्याने स्पष्ट केले.
---
रेव्ह पार्ट्या कोणत्या?
२००७ मध्ये पुण्यात सिंहगड परिसरात आणि २०११ मध्ये रायगड जिल्ह्यातील खालापूर येथे पोलिसांनी उद्ध्वस्त केलेल्या पार्ट्यांना रेव्ह पार्टी म्हणता येईल. त्यात सुमारे सहाशे व्यक्तींना ताब्यात घेण्यात आले होते. त्यासाठी मद्य आणि अमली पदार्थांची खुलेआम विक्री आणि सेवन सुरू होते, अशी माहिती केंद्रीय यंत्रणेतील वरिष्ठ अधिकाऱ्यांनी नाव न छापण्याच्या अटीवर दिली.
---
ब्रिटनमध्ये सुरुवात
१९८०च्या दशकात ब्रिटनमध्ये अशा पार्ट्या सुरू झाल्या. ज्या वेगवान संगीत आणि सलग नृत्यासाठी ओळखल्या जात. थकवा दूर करण्यासाठी मद्यासोबत अमली पदार्थांचे सेवन अंतर्भूत झाले. त्याचे लोण युरोप, अमेरिकेत पसरले, असे अधिकाऱ्याने सांगितले.
----
पुण्याची ‘ती’ हाउस पार्टी
अमली पदार्थविरोधी यंत्रणांनी अटक केलेल्या आरोपींची बाजू न्यायालयात मांडणाऱ्या ॲड. अयाज खान यांनी पुणे पोलिसांनी अलीकडे उद्‍ध्वस्त केलेली पार्टी रेव्ह नसून हाउस पार्टी असल्याचा दावा केला. याशिवाय या कारवाईत जप्त केलेल्या अमली पदार्थांचे प्रमाण व्यावसायिक नसून अगदीच किरकोळ असल्याचेही नमूद केले.