बनावट ई-चलानद्वारे
पोलिसाचीच फसवणूक
मुंबई, ता. २९ ः एपीके फाइल जोडलेल्या बनावट ई-चलानद्वारे सायबर भामट्यांनी चक्क ट्रॉम्बे पोलिस ठाण्यात नियुक्त एका पोलिस शिपायाला तब्बल सात लाखांचा गंडा घातला. विशेष म्हणजे हे बनावट ई-चलान याच पोलिस ठाण्याअंतर्गत स्थापित मोहल्ला कमिटीच्या व्हॉट्सॲप ग्रुपवर आले होते. याप्रकरणी पोलिसांनी विविध कलमांनुसार गुन्हा नोंदवला.
प्रत्येक पोलिस ठाण्यांतर्गत हद्दीतील प्रतिष्ठित व्यक्तींची मोहल्ला कमिटी नेमण्यात येते. त्याद्वारे पोलिसांच्या महत्त्वपूर्ण सूचना सर्वदूर पोचण्यासाठी, अफवांचे खंडन करण्यासाठी, कायदा-सुव्यवस्था राखण्यासाठी उपयोग होतो. त्यासाठी तयार केलेल्या व्हॉट्सॲप समूहात बनावट ई-चलानचा मेसेज आला होता. संबंधित पोलिस शिपायाने हे बनावट ई-चलान उघडून पाहिल्यावर काही वेळाने त्याच्या खात्यावर सुमारे सात लाखांचे कर्ज जमा झाल्याचा मेसेज बँकेने पाठवला. पुढील काही वेळात घडलेल्या दोन व्यवहारांद्वारे ही रक्कम अन्य अनोळखी खात्यांवर वळती केली गेली. हे सर्व व्यवहार परस्पर घडले. त्यानुसार संबंधित पोलिसाने १९३० क्रमांकावर तक्रार नोंदवली. दरम्यान, या पार्श्वभूमीवर झालेली ही फसवणूक केवळ पोलिस शिपायापुरती मर्यादित आहे की आणखी कोणाची लुबाडणूक झाली, याबाबतची माहिती पोलिस घेत आहेत.