मध्य रेल्वेची १५ वर्षांतील उच्चांकी कामगिरी
चार महिन्यांत ७.४३ दशलक्ष टन माल वाहतूक
सकाळ वृत्तसेवा
मुंबई, ता. २ : उत्पन्नवाढीसाठी मालवाहतुकीवर भर देणाऱ्या मध्य रेल्वेच्या मुंबई विभागाने यंदा एप्रिल ते जुलै २०२५ या कालावधीत ७.४३ दशलक्ष टन माल वाहतूक करत विक्रम नोंदवला आहे. गेल्या १५ वर्षांतील ही सर्वाधिक कामगिरी ठरली आहे. मागील वर्षी याच कालावधीत ७.३२ दशलक्ष टन वाहतूक झाली होती. यंदा त्यात १.५ टक्क्यांची वाढ नोंदली आहे.
जुलै महिन्यात २.०४ दशलक्ष टन मालवाहतूक झाली असून, ही आकडेवारी गेल्यावर्षीच्या तुलनेत ८.५ टक्क्यांनी अधिक आहे. चालू आर्थिक वर्षात पहिल्यांदाच एखाद्या महिन्यात मालवाहतूक दोन दशलक्ष टनांहून अधिक झाली आहे.
----
कंटेनर लोडिंगचा उच्चांक
जेएनपीए येथून जुलै महिन्यात एकूण ६४७ कंटेनर रेक्स लोड करण्यात आले. हा आतापर्यंतचा उच्चांक आहे. मुंबई विभागात एकूण ७६९ कंटेनर रेक्स लोड झाले. २८ जुलै रोजी एकाच दिवशी तब्बल १,२८५ कंटेनर वॅगन आणि ३० कंटेनर रेक्स लोड करून विभागाने नवा उच्चांक गाठला.
----
कोळसा आणि खत लोडिंगमध्येही वाढ
जुलै महिन्यात ६८ कोळसा रेक्स आणि कळंबोली माल शेडमधून ३२ खत रेक्स लोड करण्यात आले. एप्रिल ते जुलै या चार महिन्यांत एकूण ४,१०० रेक्स लोड झाले आहेत.
----
दररोज ११० मालगाड्यांची वाहतूक
मुंबई विभागात दररोज सरासरी ११०.६ मालगाड्यांची वाहतूक झाली. वसई रोड (पश्चिम रेल्वे) मार्गावर जुलै महिन्यात ५७.२ मालगाड्यांची देवाणघेवाण झाली. ही आतापर्यंतची सर्वोच्च कामगिरी ठरली.