मुंबई सेंट्रल आगारात काँक्रीटीकरणाची माती 
सर्वत्र खड्ड्यांचे साम्राज्य; प्रवाशांसह कर्मचाऱ्यांची गैरसोय
मुंबई, ता. २ : महाराष्ट्र राज्य मार्ग परिवहन मंडळाचे मुख्यालय असलेल्या मुंबई सेंट्रल आगारात करण्यात आलेल्या काँक्रीटीकरणाचा बोजवारा उडाला आहे. निकृष्ट दर्जाचे काम करण्यात आल्याने सर्वत्र खड्ड्यांचे साम्राज्य पसरले आहे. त्यात पाणी साचल्याने प्रवाशांसह कर्मचाऱ्यांची मोठी गैरसोय होत आहे.
गतवर्षी एसटीच्या वर्धापनदिनी राज्यातील एसटी आगार, बसस्थानकांचे काँक्रीटीकरण करण्याचा निर्णय घेण्यात आला होता. त्यासाठी लागणारा निधी एमआयडीसीकडून एसटीला देण्यात येईल, असेही जाहीर करण्यात आले होते. त्यानुसार मुंबई सेंट्रल आगारात कॉँक्रीटीकरणाचे काम करण्यात आले; मात्र पहिल्याच पावसात या कामाचा बोजवारा उडाला आहे. राज्यात अनेक बसस्थानक परिसरात करण्यात आलेल्या कामांपैकी जवळपास ३० टक्के निकृष्ट असल्याचे पुढे आले आहे. अनेक आगारांत पावसाचे पाणी साचल्याने प्रवाशांसह एसटी कर्मचाऱ्यांना नाहक त्रास सहन करावा लागत आहे.
==
 एसटीच्या १२६ बसस्थानक परिसरातील काँक्रीटीकरणाच्या निकृष्ट दर्जामुळे प्रवाशांना अजूनही खड्ड्यांतून प्रवास करावा लागत आहे. काँक्रीटीकरणाच्या कामाची चौकशी करण्यात यावी व संबंधित कंत्राटदारावर कारवाई व्हावी. 
- श्रीरंग बरगे, सरचिटणीस,  महाराष्ट्र एसटी कर्मचारी काँग्रेस
===
मुंबई सेंट्रल बसस्थानक परिसरात काँक्रीटीकरण झालेल्या ठिकाणी पाणी साचत नाही. आगार परिसरात अद्याप काँक्रीटीकरण बाकी  आहे. तिथे साचलेले पाणी काढण्यात आले आहे. 
- वैभव कांबळे, आगार व्यवस्थापक, मुंबई सेंट्रल