कबुतरखान्यांबाबत
सुवर्णमध्य काढा : लोढा

मुंबई, ता. ३ : मुंबईत कबुतरांना खाद्य देण्यावर निर्बंध लावल्यानंतर गदारोळ सुरू आहे. या पार्श्वभूमीवर कॅबिनेट मंत्री मंगलप्रभात लोढा यांनी मुंबई महापालिका आयुक्तांना पत्र लिहून पक्षिप्रेमी, साधू-संत व नागरिकांनी व्यक्त केलेल्या भावना लक्षात घेऊन सुवर्णमध्य काढण्याची विनंती केली आहे.

खाद्याअभावी कबुतरांचा रस्त्यांवर मृत्यू होत आहे. त्यामुळे नवीन सार्वजनिक आरोग्यविषयक समस्या उद्‌भवत आहेत. याबाबत महापालिकेने व्यापक आणि संतुलित दृष्टिकोन ठेवावा, अशी अपेक्षा लोढा यांनी व्यक्त केली. न्यायालयाच्या निर्णयाचा मान ठेवून सार्वजनिक आरोग्य आणि पशुप्रेम यांच्यात सुवर्णमध्य काढण्याचे आवाहन त्यांनी पत्राद्वारे केले आहे.

कबुतरांना खाद्य देण्यासाठी पर्यायी उपाययोजना राबवाव्यात. बीकेसी, रेसकोर्स, आरे कॉलनी, संजय गांधी राष्ट्रीय उद्यान यांसारख्या मोकळ्या जागांमध्ये सुरक्षित आणि नियंत्रित आहार क्षेत्र निश्चित करावे. दीर्घकाळ चालत आलेल्या धार्मिक व सांस्कृतिक परंपरांचा आदर राखून निर्णय घ्यावा, असे आवाहन लोढा यांनी पत्रात केले आहे.