मुंबईत अद्याप १,२१२ खड्डे शिल्लक
गणेशोत्सवापूर्वी महापालिकेपुढे मोठे आव्हान
सकाळ वृत्तसेवा
मुंबई, ता. ३ : महापालिकेने शहरातील खड्डे बुजवण्याचे काम वेगाने सुरू केल्याचा दावा केला असला, तरी अद्यापही १,२१२ खड्डे शिल्लक असल्याची माहिती प्रशासनाने ‘पॉटहोल्स क्विकफिक्स’ ॲपवर दिली आहे. गणेशोत्सव अवघ्या काही दिवसांवर आला असताना, हे चित्र कायम राहिल्यास वाहनचालकांसह गणेशभक्तांनाही मोठ्या अडचणींचा सामना करावा लागण्याची शक्यता आहे.
महापालिकेकडे आतापर्यंत खड्ड्यांबाबत एकूण सात हजार ७८८ तक्रारी प्राप्त झाल्या असून, यातील ४६७ तक्रारी गेल्या महिन्यात नोंदवल्या आहेत. विशेष म्हणजे, रविवारी एका दिवसातच ८४ तक्रारी प्राप्त झाल्या. याशिवाय ८२ खड्डे पुन्हा उखडल्याच्या नव्या तक्रारीही महापालिकेला मिळाल्या आहेत. महापालिकेच्या माहितीनुसार, सहा हजार ५७६ खड्ड्यांचे निवारण करण्यात आले, तर एक हजार ९१० तक्रारी चुकीच्या असल्याचे स्पष्ट करण्यात आले. तसेच ५५५ तक्रारी संबंधित विभागांकडे वर्ग करण्यात आल्या आहेत.
----
अडथळे दूर करण्याची विनंती
दरम्यान, मुंबई सार्वजनिक गणेशोत्सव समन्वय समितीने महापालिकेला पत्र देत गणेशोत्सवापूर्वी खड्डे, केबल्स तसेच झाडांचे अडथळे दूर करण्याची विनंती केली आहे; मात्र प्रत्यक्षात रस्त्यांवरील स्थिती अजूनही बिकट असल्याने उत्सवकाळात नागरिकांना त्रास होण्याची भीती व्यक्त केली जात आहे. त्यातच पावसाचा जोर वाढल्यास अडचणी आणखी वाढण्याची शक्यता आहे. त्यामुळे गणेशोत्सवापूर्वी महापालिकेला वेळेवर उपाययोजना करावी लागणार आहे.