नायर रुग्णालयाच्या वसतिगृहातील कँटीन दोन महिन्यांसाठी बंद
सकाळ वृत्तसेवा
मुंबई, ता. ४ : नायर वैद्यकीय महाविद्यालयातील एमबीबीएसचे शिक्षण घेणाऱ्या ४५० वैद्यकीय विद्यार्थ्यांना जेवणाची समस्या भेडसावत आहे. या विद्यार्थ्यांना सवलतीच्या दरात नाश्ता आणि रात्रीचे जेवण देणारे वसतिगृह कँटीन गेल्या दोन महिन्यांपासून बंद आहे. रुग्णालय प्रशासनाने दुसऱ्या कँटीनमधून पर्यायी जेवणाची व्यवस्था केली असली, तरी विद्यार्थ्यांनी जेवणाच्या गुणवत्तेवर प्रश्न उपस्थित केला आहे.
कोविड महामारीच्या काळात बंद असलेले नायर मेडिकल कॉलेजच्या हाजी अली बॉईज हॉस्टेलचे कँटीन तीन वर्षांनी ऑगस्ट २०२३मध्ये एका आंदोलनानंतर सुरू करण्यात आले. या हॉस्टेलमध्ये राहणाऱ्या ४५० वैद्यकीय विद्यार्थ्यांना सवलतीच्या दरात नाश्ता, दुपारचे जेवण, संध्याकाळचा नाश्ता आणि रात्रीचे जेवण मिळत असे. वैद्यकीय विद्यार्थ्यांना सुमारे २०० रुपयांत नाश्ता आणि रात्रीचे जेवण सहज मिळत असे, परंतु गेल्या दोन महिन्यांपासून हॉस्टेल कॅन्टीन बंद असल्याने विद्यार्थ्यांना अनेक समस्यांना तोंड द्यावे लागत आहे.
एका विद्यार्थ्याने नाव न सांगण्याच्या अटीवर सांगितले, की खूप संघर्षानंतर वसतिगृहात एक कँटीन सुरू करण्यात आले. कोणतीही सूचना न देता ते बंद केले. विद्यार्थ्यांनी आरोप केला, की दुसऱ्या कँटीनमधील जेवणाचा दर्जा चांगला नाही. विद्यार्थ्यांच्या आरोग्यावर परिणाम होऊ शकतो. काही विद्यार्थ्यांनी सांगितले, की चांगले जेवण हॉटेलमधून मागवावे लागते. परंतु ते जेवण महाग असल्याने परवडत नाही.
नायर रुग्णालयाचे अधिष्ठाता डॉ. शैलेश मोहिते यांनी सांगितले, की वसतिगृह कँटीन चालवण्याचे कंत्राट ज्या केटररला देण्यात आले होते त्याच्याकडे परवाना नव्हता. त्यांनी करारानुसार मान्य केलेले भाडेही प्रलंबित ठेवले होते. कँटीनमध्ये अनियमितता आढळून आल्यानंतर त्यांची सेवा रद्द करण्यात आली. नवीन केटरर्स नियुक्त करण्याची प्रक्रिया सुरू झाली आहे. वसतिगृहातील वैद्यकीय विद्यार्थ्यांना सेवा देण्याचे निर्देश रुग्णालय कॅम्पस कँटीन व्यवस्थापनाला देण्यात आले आहेत.